“بعد انتقادها بسبب تصريحاتها الأخيرة”.. حنان شوقي توجه رسالة لـ السيدات: «المفروض تحمي جوزك وهو يحميكي ويبوس إيدك ورجلك»
قامت الفنانة الجميلة حنان شوقي، بالرد على منتقدي تصريحاتها الأخيرة بخصوص اهتمام الزوجة بزوجها، وأشارت بأن من يسخرون من تصريحاتها هم من يرغبون عيش الحالة نفسها.
"بعد انتقادها بسبب تصريحاتها الأخيرة".. حنان شوقي توجه رسالة لـ السيدات: «المفروض تحمي جوزك وهو يحميكي»
وأكدت الفنانة، خلال تصريحاتها مع القاهرة 24:ـ “الواحدة منا المفروض إنها تحمي جوزها وتبوس رجله كمان، وهو يحميها ويبوس إيديها ورجليها واللي بقوله ده هو الحق، واللي بيسخروا من كلامي هما أحرار، وعلى فكرة الأجانب براه مصر بيعملوا كده مع بعضهم، وهو الكره الموجود بين الناس دلوقتي وصلنا للدرجة دي ونسانا الحب والإحترام اللي بجد”.
وواصلت حنان:ـ “والناس اللي بتقول على كلامي هبل، هما الناس اللي نفسهم يعيشوا الحالة دي مش عارفين يوصلوا ليها، وأنا بقول الحقيقة وأقسم بالله أنا شفت والدتي وهى بتعمل كده مع والدي وأنا عملت كده مع جوزي، والموضوع أمر مُتبادل بين الطرفين، ولازم يحترموا بعض ويشيلوا بعض”.
وأضافت:ـ “وهو الناس ليه مبقتش قادرة تسمع الحقيقة، وهما من جواهم عارفين إني بقول الحق.. وعزة جلال الله أكتر الناس عارفة إني الكلام اللي بقوله هو الحقيقة، ولكن اللي بينتقدوا عاشوا تجارب صعبة مع أشخاص مريضة نفيساً، والزوج لما يبوس إيد مراته ده بروتكول الراجل تجاه الست”.
وأنهت الفنانة حديثها:ـ “وهو إحنا عاوزين مشاكل وخلافات وبس..دي حالة من الحب.. ليه الناس مش عاوزه تتقبل الحقيقة اللي بجد، وبقى أغلب الناس عاوزه تعيش حالة من الحرب بسبب كتر النفاق والكدب والغش والخداع، ونسمع واحدة تقول أحمية إيه؟.. لأ إضربيه بالنار وهو يضربك بالسكينة في قلبك، وأول لما تشوفيه داخل البيت إضربيه برف المقشة على دماغه، ومش بس كده هو كمان يضربك بالجزمة.. بجد إحنا بقينا مجتمع فوضوي وضعيف”.
