كشفت الفنانة الكبيرة إلهام شاهين، عن كواليس رحلتها الطويلة في مواجهة جماعة الإخوان عقب وصولهم للحكم منذ يونيو 2012 حتى قيام الثورة ضدهم في يونيو 2013.
إلهام شاهين: أنا أول واحدة نزلت الشارع في 30 يونيو
وقالت إلهام، في مداخلة هاتفية مع الإعلامية إنجي القاضي، مقدمة برنامج “مساء dmc” الذي يذاع عبر قناة “dmc”: “طبعًا 30 ستة و3 سبعة دول يومين مهمين جدًا جدًا في حياتي يعني شيء فارق في حياتي لإن أنا مش عارفة لو اليومين دول ما حصلوش ونجحنا النجاح الكبير اللي لفت أنظار الدنيا كلها مش عارفة أنا كان ممكن يحصلي إيه لإن أنا كان عندي عداوات شديدة جدًا مع الإخوان وحتى مع رئيسهم يعني إنه حاول كتير إنه يطلبني عشان أروح أقابله عشان يفهم إيه الخلاف فأقولهم أنا مش معترفة بيه أنا مش معترفة إن هو رئيس لما اعترف إنه رئيس أبقى أجي أقابله”.
وأضافت إلهام: “وطبعًا أنا رفعت قضايا عليهم وسجنت لهم واحد بيدعي إن هو شيخ وبيدعي إن هو دكتور في الأزهر ولما أنا اختصمت الأزهر في القضية الأزهر بعت قال إنه مالوش صلة بيهم خالص فده قفلهم القناة.. وأنا خدت حكم بغلق القناة وأعتقد إن ده حكم تاريخي لم تغلق قناة في تاريخ التليفزيونات كلها بحكم محكمة إلا القناة اللي أنا أغلقتها لهم فالحمد لله القضاء المصري الشريف المحترم كان عادل جدًا وخدلي حقي أنا وكل فنانين مصر لإنهم ما كانوش بيشتموني أنا بس.. هما الحقيقة أهانوا كل الفن والثقافة ورموزه الكبيرة الأستاذ نجيب محفوظ اللي خد جايزة نوبل الكاتب الكبير العظيم لم يسلم من لسانهم”.
وتابعت إلهام: “الأحكام دي أنا خدتها في ظل حكم الإخوان وده الأقوى.. وطبعًا أنا أكبر عدوة ليهم ولا زالت حتى الآن هما بيشتغلوا عليا ع السوشيال ميديا كل فترة يشغلوا اللجان بتاعتهم على أي خبر ليا.. فطبعًا أنا 30 ستة ده يوم النجاة بالنسبة لي و3 سبعة يعني أنا حضرت أكبر احتفال يعني 30 ستة أنا أول واحدة نزلت الشوارع كان ميعادنا نلتقي ونتحرك من وزارة الثقافة الساعة 12 في الزمالك.. أنا 9 الصبح كنت في الشارع بلف على صديقاتي أخدتهم من بيوتهم أخدت يسرا من بيتها وأخدت ليلى علوي من بيتها وأخدت هالة سرحان من بيتها مش جايلي نوم مش قادرة استنى للساعة 12 وطلعنا على وزارة الثقافة وانضمينا بقى لكل الفنانين من زملائنا كل أهل الفن نزلوا”.
الجدير بالذكر أن الفنانة إلهام شاهين، شاركت في الموسم الرمضاني الماضي بمسلسل “بطلوع الروح” الذي عرض في النصف الثاني من شهر رمضان وحقق نجاحًا كبيرًا.
وهو المسلسل الذي تدور أحداثه حول فتاة تدعى (روح) يخدعها زوجها ويستدرجها من مصر إلى وكر داعش في سوريا، فتحاول الهرب لينتهي بها المطاف في معسكر للهاربات من التنظيم.
“بطلوع الروح” بطولة: منة شلبي، وإلهام شاهين، وأحمد صلاح السعدني، ومحمد حاتم، ودياموند بو عبود، وأيمن عزب، وعزت زين، وعادل كرم، وعلي الشجيري، من تأليف: محمد هشام عبية، وإخراج: كاملة أبو ذكري.
