علقت المطربة الشعبية بوسي، على خبر اعتزال الفنانة ميرهان حسين، وذلك خلال لقائها أمس الجمعة مع الإعلامية أسما إبراهيم، مقدمة برنامج “حبر سري” الذي يعرض عبر قناة “القاهرة والناس”.
بوسي: ميرهان حسين عندها إمكانيات جامدة
حيث قالت: “ميرهان طبعًا هي حبيبتي بحبها جدًا.. حبيبة قلبي يعني.. وفعلًا هي موهبة كبيرة أوي ما شاء الله عندها إمكانيات جامدة.. ممكن هي شايفة إنها تستحق أكتر من كده ومش شايفة إن فيه مقابل أو مش شايفة إن في حد يديها فرصة أكبر.. هي فنانة شاطرة جدًا وشاملة وعندها إمكانيات عبقرية يعني بتعرف تقلد وتعرف تعمل ميك أب.. وده قليل أوي لما تلاقيه في فنانة في وقتنا ده إن يبقى عندها الإمكانيات دي ومحدش بيستغلها بتبقى صعبة”.
وأضافت: “اللي مالوش شلة في الوسط بيتظلم.. في التمثيل.. لكن في الغنا الموضوع بيختلف عشان انتي هنا بتعملي أغاني وبتعرضيها وإحنا دلوقتي في زمن إن كل فنان بينتج لنفسه غير زمان.. الغنا مختلف.. لكن التمثيل لو معندكيش شلة ومفيش منتج متبنيكي هتضيعي وهتتظلمي”.
وتابعت: “أنا بخش التمثيل بشغلي.. وماليش شلة.. أنا شغالة الحمد لله أنا مهنتي الأساسية غنا.. التمثيل ده حاجة إضافية حاجة أنا داخلاها بمزاجي مش مجبرة عليها.. عارفة لما يبقى نفسك تبقي فنانة شاملة.. بتغني وتعملي استعراض وبتعرفي تمثلي.. اللي هو زي نعيمة عاكف وشريهان ونيللي وسعاد حسني مع حفظ الألقاب.. بس ممكن يبقى اللي قدامك مش مديكي فرصة بس أنا الحمد لله أنا نجمة في مجالي”.
