“بعدما طالبت أسرته بالإفراج عنه”.. بسمة وهبة تُهاجم مادلين طبر: «عادل إمام خط أحمر يا ست مادلين ومش هسكت»
قامت الإعلامية المعروفة بسمة وهبة، بالرد على تصريحات الفنانة مادلين طبر والتى أثارت بها الكثير من الجدل خلال الساعات القليلة الماضية، بخصوص الزعيم عادل إمام حيث طالبت عائلته بالإفراج عنه حتى يتم تكريمة بدورة المهرجان القومي للمسرح، والتي تحمل اسمه، وقامت مادين بتوجيه تحية خاصة لكل من اقتحموا منزله واحتفلوا معه بعيد ميلاده، على حسب ما قالته.
وأكدت الإعلامية، أثناء تقديمها لبرنامج “90 دقيقة”، والمُذاع عبر فضائية “المحور” أمس الثلاثاء، بأن الزعيم خط أحمر، موضحة:ـ “ده عادل إمام يا ست مادلين، وأنا مش هسكت وهقدم فيكي بلاغ دلوقتي، وهقول في البلاغ إنك قولتي نروح ونقتحم فيلته.. دي دعوى غير قانونية، وبعدين إنتي عرفتي من أين إن في حد إقتحم بيته.. إنتي تعرفي الناس دول بالنسبة له إيه؟.. بتتكلمي عن الفنانة يسرا والفنانة لبلبة دول عشرة عمر وأصدقاء من زمان، وبعدين بتحشري نفسك في اللي ملكيش فيه ليه؟.. إنتي مش في نفس المكانة”.
وواصلت بسمة:ـ “وكمان جمهور ومُحبي الفنان في قمة الحزن بسبب اللي انتي قولتيه.. في كلمة إنتي قلتيها ولها أكتر من معنى، وهى كلمة (تفرج عنه)، وبجد كلمة ليها معنى مش كويس ولا تليق أبداً بالزعيم”.
وأضافت الإعلامية:ـ “وأنا بناشد كل الناس تخلي بالها من تصريحاتها، وتصحصح وتشوف هى بتقول إيه، ولو كان في شخص معين قالك تقولي الكلام ده فهو أذكى منك علشان لبسك في الحيط، ومش بس كده ده دخلك جوه الحيط من جوه.. عادل إمام خط أحمر، ولو سمحتي إوعي تفكري تعملي حاجة زي دي مرة تانية أحسنلك”.
وأنهت وهبة حديثها:ـ “الكلام اللي انتي قولتيه ميصحش يتقال على عادل إمام، وده علشان هو له مكانة كبيرة بمصر والعالم العربي كله، ومفيش حد هيسكت على الكلام ده أبداً”.
