أنا راجل صعيدى زى أبويا ومش ممكن أتجوز من الوسط الفنى”.. أحمد عبدالله محمود يرفض الزواج من داخل الوسط الفنى لهذا السبب
تحدث الفنان المعروف أحمد عبدالله محمود، عن تفاصيل حياته الشخصية وزواجه السابق من الفنانة الجميلة سارة نخلة، وعلق قائلاً:ـ “هى الحدوتة دلوقتى إنى بقيت بسمع الكلام بسمع كلام والدتى، وبقولها إنتى رحتى فين؟.. إنتى قاعدة على الكنبة طول الوقت وبتتعاملى مع ناس نظيفة، وإزاى إنتى بتعرفى في الناس وكمان في النهاية بتتطلعى صح، والموضوع مش في الارتباط وبس ده في إختيار الاصدقاء كمان”.
وأكد الفنان أحمد أثناء استضافته الليلة ببرنامج “الستات ما يعرفوش يكدبوا”، والذى يُذاع من خلال فضائية “cbc” قائلاً:ـ “على فكرة أنا راجل شرقى قوى، وللأسف عرفت ده مؤخراً وإنى زى والدى رجل صعيدى قوى، وبغير جداً على أهل بيتى.. مش مسيطر بس راجل له كل احترام وتقدير”.
وأضاف أحمد محمود:ـ “لا أعتقد بأنى سأتزوج من داخل الوسط الفنى، وأكيد مش هسيب نفسى أروح للحتة دى تانى أبداً، وانا معنديش مشكلة بس كل اللى أنا عاوزة إنسانة مُتفرغة ليا.. حد يكون كل حياتى، وللأسف الشديد أنا عندى مشكلة إنى بدلق بسرعة، ولكن إتعلمت كتير وبقى عندى حتة الخوف والقلق”.
وأوضح الفنان خلال اللقاء:ـ “أنا جلنف شوية في قصة الحب، وده بمعنى إنى ممكن أقول لحبيبتى بحبك يا بت، وكتير من الوقت مبعرفش أكون رومانسى وعندى جمود مبعرفش أسبل.. بس ممكن أعبر عن اللى جويا بطريقة تانية”.
وأنهى ابن الراحل عبدالله محمود حديثة عن السيدات قائلاً:ـ “الستات كلهم لو عاوزين يكدبوا هيكدبوا.. مفيش حاجة عاوزين يعملوها إلا وعملوها، والأكيد الستات لغز كبير أوى.. بس لغز جميل وحلو أوى، وأى إنسان يقول إنه فهم اللغز ده يبقى كداب”، وأكد أحمد عن أنه يبحث عن علاقة عاطفية ونموذج للحب مثل قصة حب والده الراحل مع والدته.
