افكار سهلة لتجهيز طلبات طول الشهر توفر جهدك ووقتك وتحافظ على مصروف البيت

يقتطع العمل ساعات طويلة من يوم المرأة العاملة، فنجدها تجري مسرعة الي البيت لإعداد الطعام ومتابعة الأعمال المنزلية المختلفة بالإضافة اى مساعدة الأولاد في استذكار دروسهم، ولهذا تحاول السيدة العاملة دائما لإيجاد طرق بديلة تساعدها في ايجاد بعض الراحة، مثل شراء الطعام الجاهز، استئجار خادمة للمساعدة الأسبوعية في أعمال التنظيف، وهكذا.

افكار سهلة لتجهيز طلبات طول الشهر توفر جهدك ووقتك وتحافظ على مصروف البيت 1 2/3/2015 - 9:16 م

افكار سهلة لتجهيز طلبات طول الشهر توفر جهدك ووقتك وتحافظ على مصروف البيت

و لكن مثل هذه البدائل قد تشكل عبئا ماديا على الاسرة وتحملها مصروفا زائدا عن مصروف البيت قد لا تستطيع أن تتحمله كل الميزانيات، وهنا الحل في هذه المقالة وتجهيزات تستعدي بها لتكوني جاهزة طوال الشهر باذن الله ومستعدة لأي طارئ.
شوفي بفي احنا حنعمل ايه..؟

أولا: اهم حاجه لازم انك تعملي منيو خاص بالشهر بتاعك أولا قبل ما تشتري طلبات البيت وده ليه؟ لأنه هيسهل علينا ويعرفنا الحاجات اللي هتشتريها ايه بالزبط؟ وبالتالي لا نشتري حاجه غير لازمة وتضيع فيها الفلوس عالفاضي.

تانىا: نشتري الاساسيات زي اللحوم والدجاج والممبار مرة واحدة إنما السمك انا بجيبه طازج أول بأول مابحبش اني اخزنه، ولو تم شراء كميات منه يجب عدم تنظيفه فقط يتم غسله بالماء ووضعه في اكياس بدون تنظيفه.
و اللحوم بجيبها نوعين :

1- اللحمة المفرومة.
* هنعمل منها كفتة انواع زي مثلا كفتة البرغل، كفتة الارز، كفتة داوود باشا، كفتة الحاتي، اصبعها وفي اطباق فل ونشيلها وعلى الفريزر نحطها.

* كمان ح نعصج حبه ونقسمهم للمكرونات بصلصة أو بشاميل أو للطبيخ اى طبيخ يتحط معاه لحمه مفرومه أو صينية مسقعة باللحمة المفرومة – كمان للبيتزا باللحمة المفرومة.

* كمان حنشيل جزء لعمل ارغفة الحواوشي وده حنشيلة غير متبل يعني اللحمه المفرومة زي ما هي.

2- اللحمه قطع لاجل السلق والطبيخ وكباب الحلة.

* بصي بفي احنا هنسلق جزء ونقسمه ونشيله في اكياس على قد الاكلة وفي الفريزر نحطه.

* جزء ثاني لكباب الحله مكعبات صغيرة متبله بالبصل والفلفل الاسود ونشيلها متبله في الفريزر.

* جزء للطواجن أو الشوى وبرضه نتبله ونشيله متبل في الفريزر وكمان البفتيك انا بتبله بالبصل والفلفل الاسود والملح والشطة واغلفه بالبقسماط وعالفريزر.

* شاورما لحمه.. بقطع اللحمة قطع صغيره واتبلها ملح وفلفل اسود وشطه وكاري وقرفة وليمون ومعلقه خل ونشيلها متبله

3- حلويات المدبح.. وهي الممبار والفشة والكرشة والعكاوي.. تعالوا نشوف حنعمل فيها ايه..

* الممبار: انا بجيبه متنضف ومع ذلك لازم انقعه في الخل وبغسله بالملح واشطفه بالماء الجاري ونحشيه رز ونسلقه ونشيله مسلوق واحذري انط تشيليه نئ لان الارز بيتفتت ويبفي وحش جدا، لذلك لازم تشيليه مسلوق.

* فشه: نسلقها ونشيلها مسلوقة ولماتطلع وتفك نقطعها ونجمرها في السمنه.

* كرشه: برضه نفس الحكايه زي الفشة..

* العكاوى: ننضفها ونشيلها مسلوقة زي اللحمة بالزبط..

* الكبده بالرده والكبده الاسكندرانى انا بتبلها بالثوم المفروم وملح وكمون وفلفل اسود واشيلها في الفريزر.

4- الفراخ
و دي اكلاتها لا تعد ولا تحصي وليها طرق كتير للتخزين أن شاء الله اعمل لها مقال منفصل لنتكلم عنها بالتفصيل.. ودي بعض افكار لبعض الاكلات..
* حبه فراخ متقطعين ومتبلين جاهزين نعمل بيهم.. مكرونه النجرسكو، شاورما فراخ.
* شيش طاووك متبل ونطلعه نعمله مع البصل والفلفل والطماطم.
* قطع الفراخ الصغيره اللي بتبفي لازقه في العظم حنعمل بها كفته فراخ متصبعه ونشيل في الفريزر.
*برجر فراخ
* كوردون بلو مفروم أو حتى صحيح
* الفراخ المشويه.. نتبلها ونشيلها في الفريزر
طريقة عمل الفراخ المشويه في الفرن

* الفراخ الكنتاكى.. نتبلها ونشيلها
* الفراخ المحشيه.. بشيلها متبله وطلعيها تفكيها واحشيها في نفس اليوم اللي حتعمليها فيه.
* بانيه متبل ومتغطى بالبقسماط ومتقسم ف اكياس أو اطباق في الفريزر.
* وراك متبله للشوى.
* صدور متبله للحمام الكداب.. بتفرديها وتحشيها بالارز وتلفيها وتسلقيها وتحمريها وتاكلي اجمل والذ حمام كداب.

5- البقوليات..
و دي نفس الطريقة كلها بننقيها وننقعها ونسلقها زى…
* العدس الاصفر.. اسلقه مع الخضار واهرسه واشيله متقسم ف اكياس بينفع وقت زنقه مع الشعريه الجاهزة وممكن كمان شوربه سخنه بيبفي روعه…
* الفول ندمسه ونقسمه ع اد الاكله وع الفريزر بسرعه علشان مش يسود لونه.
* الطعميه ننقع الفول ونفرمها مع الخضار ونقسمها وع الفريزر برضه.
* البليله نفس الحكايه برضه نعملها وع الفريزر متقسمه في اكياس.
* والاهم بفي الحمص ننقعه ونسلقه ونقسمه وع الفريزر وبستخدمه لعمل حمص الشام ومع الكشري وسلطة الحمص اللذيذة.
*الشعرية ولسان العصفور سواء الحروف أو العادي والمكرونه المحمرة نحمرهم من غير دهون خالص تحت الشوايه ونحفظهم في برطمان ولما نستخدمهم بفي نقدح السمن وننزل بيهم ونقلبهم في السمن تقلبتين بس عشان ما يتكسروش مننا وبيبفي روعه وسريعه جداً وتوفر لك في الوقت.
* الفاصوليا البيضاء واللوبيا.. نسلقهم ونقسمهم ونشيلهم في الفريزر.
* حتى الأرز البسمتى للكبسه نحط عليه بهاراته وتوابله ونقسمه ونشيله برضه..

6 – الخضار بقى بنجيبه في المواسم بتاعته وبخزنة لأنه بيبقى رخيص وحلو وموفر جدا.
دي طريقة تفريز البصل

و دي طريقة تفريز السبانخ

7 – الفاكهه برضه نفس الشي في مواسمها برضه بشيل منها للعصائر، ده طبعا غير المربي اللذيذة اللي بعملها

8- الحلويات والعصاير
بجهز السيرب أو الشربات أو العسل بتاع الحلويات في زجاجة على رف الثلاجة أو في باب الثلاجة..

و ده صوص الشيكولاته بعمله واشيله في برطمانات في الثلاجه واحطه على اي كيكه وبتبفي احلي من اي تورته من برا

انتظروني ومزيد من الأفكار الجديدة الموفرة في الوقت والجهد واكيد في مصروف البيت وحنينة على الميزانية..


قد يعجبك أيضاً

اترك رد

لن يتم نشر عنوان بريدك الإلكتروني.