أفضل النصائح للمراه في شهر رمضان |الجزء الثانى

مازالنا بنجهز وبنستعد لشهر رمضان الكريم واتفقنا في الجزء الأول مش هنضيع وقتنا وهنتفرغ للعباده  ونغتنم الفرصة ونجمع حسنات هنكمل التجهيزات ، 1- نحمر مقدار من الشعرية اللى هنستهلكه اثناء الشهر(حسب استهلاك اسرتك), واحفظيه في برطمانات زجاجيه، وبنفس الطريقه هنحمر لسان العصفور ونحفظه. وهتجمعى بواقى العيش البلدى وحمصيها في الفرن وتحتفظى بها في برطمان زجاجى دى بقا عشان يوم الفته،
وهنحمر المكرونة والشعرية ونحفظها بنفس الطريقه.

أفضل النصائح للمراه فى شهر رمضان |تجهيزات رمضان|الجزء الثانى

أفضل النصائح للمراه في شهر رمضان | تجهيزات رمضان | الجزء الاول
2- البقسماط

هنحمص بواقى العيش الفينو ونطحنه ونضع عليه بهارات ويكون بقسماط جاهز.

3- الخضار
هنجهز اكياس من الخضار (بسلة، فاصوليا، سبانخ، قلقاس )كميات متخزنه في الفريزر وجاهزة على الطهى، و تفرزى الكرنب المسلوق ومقطع وورق العنب حسب احتياجاتك.

4- البقول
اسلقى فاصوليا بيضاء ولوبيا وقسميها في اكياس للطبخ (مقدار الطبخه) واحفظيها في الفريزر لحين الاستخدام.

 5- الفلفل الالوان 
قطعى الفلفل الالوان شرائح رفيعة واحفظى كل لون في كيس لوحده منفصل بالفريزر ونخرجه وقت الاستخدام

6- البصل والثوم

نعمل كميه من البصل المفروم وتعبئتها في أكياس وحفظها في الفريزر وعمل ثوم مفروم وتجميده مفروم في علبه محكمة الغلق أو كيس بلاستيك.

7 – الفول

ندمس 2 كيلو فول حسب استهلاكنا الطبيعي في الشهر ونقسمه في اكياس على قد الوجبة ونحفظه في الفريزر وممكن نعمل منه أصناف كتير أوى تنفع للفطار وللسحور (سوف اكتب مقال مبسط عن طرق ووصفات كتير للفول).

8- البيتزا

 جهزى عجينة البيتزا وقسميها وفرزيها وجهزى الصوص الخاص بهاواحفظيها.

9 – برطمان البهارات
معلقه كبيره كمون.. معلقه كبيره كسبره ناشفه مطحونه.. معلقه صغيره قرفه ناعمه
معلقه صغيره فلفل اسود.. معلقه صغيره حبهان مطحون (هيل).. نصف معلقه صغيره قرنفل مطحون
نصف معلقه صغيره كبابه صيني مطحونه (بديل جوزه الطيب)
نخلطهم وتكون جاهزه للاستخدام.

شنطة رمضان
لو عندك نية توزيع  شنطة رمضان حاولى تجهزي محتويتها قبل بداية الشهر الكريم أو في أول يومين (هيكون في تفاصيل عن شنطة رمضان في مقال مستقل). تابعونا في الاجزاء القادمه من تجهيزات لشهر رمضان