دومينيك حورانى: «موصلتش بعلاقتى واللى هيشغلنى علشان أنا صاحبته مش عاوزاه»

قامت الفنانة المعروفة دومينيك حورانى، بإثارة الكثير من الجدل خلال الساعات القليلة الماضية، بعد أن كشفت عن الأسباب والعوامل التى ساعدتها على الدخول للوسط الفنى، والمشاركة في الكثير من الأعمال الفنية، وأوضحت بأنها تمتلك شكلاً مُميزاً وموهبة مُختلفة، وأيضاً لديها القدرة على الإبداع.

وعلقت الفنانة، أثناء استضافتها ببرنامج “أنا سعيد”، والذى يقوم بتقديمة الاعلامى سعيد جميل، والذى يُذاع من خلال فضائية “القاهرة والناس”، وقالت:ـ “بجد شكلى المُميز والمختلف كان له عامل كبير لدخولى الوسط الفنى، وكمان الاختلاف في الشخصية والموهبة المُتميزة”.

وتابعت دومينيك:ـ “وحقيقى أهم حاجة الإبداع والتميز والموهبة والحظ شوية، ولكن موضوع العلاقات وكده مفدنيش بشئ، وأتحدى أى منتج أو مخرج يقول إنى إتصلت عليه علشان شغل، وأنا موصلتش بعلاقتى نهائى، ولكن شكلى الحلو المُميز واللون الفنى المُختلف هما اللى ساعدونى.. علشان كده وصلت وبجد عندى موهبة في التمثيل والغناء”.

وأضافت الفنانة:ـ “اللى هيشغلنى علشان أنا صاحبته مش عاوزاه، ولكن اللى هيشغلنى علشان هضيف جديد للعمل ولأنى موهوبة مش عشان صديقته أو مراته يا مرحب، ومش كل الناس هتاخد نفس الفرصة في الحياة، ولكن الفرصة بتيجى في الوقت المناسب والمكان المناسب، وأنا مليش صداقات داخل الوسط الفنى”.

وتحدثت الفنانة أثناء الحوار، عن الرجل وعن دوره في البيت والحياة، وأنه لا بد من أن يقوم بإسعاد زوجته حتى ينال ما يريد، وعلقت قائلة:ـ “بجد الراجل أساس البيت وشايل كل حاجة، ولكن المفروض إنوا يشوف طلبات مراته كلها، ويعملها كل الى نفسها فيه، وهو إتخلق علشان يسعد الست اللى معاه، ولو عمل ده مش هيشوف غير البهجة والسعادة والدلع في حياته، وعمروا ما هيشوف نكد أبداً”.