- عند طاشة الملوخيه بتحمرى الثوم في معلقة سمنة الاول ولما يبدء يدخل على اللون لدهبى نزلى عيهم الكسبرة تقلبتين وطشيها .
- وبعد ذلك لما تيجى تعملى شوربة الملوخية حطى فيها شوية ثوم مفروم وكسبرة ومكعب مرقة دة لو الشربة مش دسمة لو دسمة نستغنى عنة.
- ولما تيجى تسلقى مكرونة بنحط ملح في الماية قبل ما تغلى علشان نعمل معادلة للطعم.
- و عند عمل أرز بشعرية وانتى بتحمرى الشعرية خلى لونها دهبى بيبقى الرز فاتح وزى اللولى الرز المصرى 2 كوب رز عليهم 2 كوب ماية ونص كوب شعرية والملح حسب زوقك .
- و إذا نسيتى معيار الماية لسقى الرز يبقى بعقلة صوباعك والطريقة دى ناجحة جداً.
- الرز البسمتى 2كوب ارز عليهم 4 كوب ماء.
- ورد الكشرى البصل المحمر علشان يبقى كرسبى بعد ما تقطعى رشى علية دقيق واقلى أو بعد ما يتحمر رشى صفية من الزيت ورشى علية نشا.
- و صلصة الكشرى ابشرى طماطم وسبكيها ونزلى الصلصة غلوتين واعملى طاشة ثوم وكسبرة وطفيها بمعلقة خل ودى طريقة المحلات الكشري المشهوره.
- شطة الكشرى الزيت حمرى شطة في زيت ساخن وطشى بالصلصة بتاعت الكشرى.
- مكرونة الكشرى بعد ما بنسلقها بنحط عليها معلقة زيت ونقلبها علشان ما تمسكش خناق في بعض تبقى منفصلة عن بعدها.
- و عند سوا المكرونة مش تخليها تعجن واول ما تسقطيها تعدى تقلبى شواية فيها لحد ما تحسى انها مش ماسكة في بعض.
- و لو معندكيش زبادى وهتعملى معجنات هاتى كوباية لبن وعليها معلقة خل.
- و قبل ما تعملى معجنات اختبرى الخميرة الاول لو عملت فقعات هوا تبقى شغالة لو زى ما هى تبقى لا تصلح الاستخدام.
- و سمك عجينة البينزا بيكون نص سم.
- و محشى ورق العنب اعصرى ليمونة قبل التسويا على وش الحلة.
- و لما تكونى هتسلقى لحمة أو فراخ خلى الماية تغلى اوى وتكونى نقعة اللحمة في ماية وخل والفراخ نفس الكلام علشان نطرى الانسجة واى رائحة ظفارة تروح منها بس طبعا بنشطفها قبل ما نضعها في الحلة.
- اللحمة اشترى قطعة يكون فيها حتة دهون علشان تعمل ريق لشوربة.
- وأول ما تدخلى مطبخك خلى عندك أولويات ازاى يعنى لو هتطبخى طلعى اللحمة انقعيها ولعى على ماية علشان تسلقيها والخضار ابدئى جهزى والرز بتعملى اخر حاجة علشان يبقى ساخن.
- و لو هتعملى كفتة مشوية خلى الجزار يفرملك حتة ضانى وحتة كندوز وكلى احلى كفتة.
- لما تشترى بتنجان رومى نقى الخفيفة.
- البطاطس بلاش تنقى اللى فيها بقع خضراء.
- الفراخ اشترى اللى لونها وردى.
- و السمك اشترى السمكة اللى عينها بتلمع والجسم يكون ناشف مش طرى والقشر ماسك مش بيطلع في ايدك والخياشيم وردى وريحتها حلوة مش ريحتها عفن.
- و الفينو نشف عندك اطحنى وحطى علية توابل وبقى عندك فجيتار بيتى.
- و البيض حطى في الثلاجة لانه مش بيستحمل بيضرب بسرعة.
- و اللبن لو قطع منك اعملى قرص أو زبادو أو كيك أو بشاميل بس ما يكونش مرر منك.
- و لو بتخافى من البشاميل ليقلقع اضربى المكونات في الخلاط وعلى نار هادية وقلبى لحد ما يتقل معاكى.
- و عند سقى محشى البتنجان والكوسة والفلفل نص الحلة لانهم مش بياخدو سوا.
- و رصى ورق العنب أو الكرنب في الحلة خلى فراغات بسيطة بينهم علشان يستوى براحتو والسقى يدوب الشوربة حوالية.
- و حاولى بقدر الامكان تعملى حاجاتك في البيت زى تدميس الفول وعجينه الطعميه والمعجنات.
- وبخصوص حفظ البقوليات لمده طويله يضاف لجميع انواع البقوليات ورق لوري أو رش زيت نباتي ويحفظ في الأكياس الطعام أو بطرمان زجاج.
احسنتم النشر