طريقه عمل اللحمه انتركوت بالخضار

التنوع فى الاكل مطلوب فى مختلف الأوقات خصوصا لو فى عزومات او مناسبه يبقي لازم كل ست بيت او زوجه تتعلم تتنوع فى طرق مختلفه للاكل
كيلو لحمه انتركوت بشوحها على نار وسط عاليه في تلت كوباية زيت زيتون لمدة دقيقه على كل ناحيه.

بحط ع اللحمه كوباية بصل متقطعه حتت صغيره، كوباية جزر متقطع مكعبات و نص كوباية كرفس و بقلب لمدة دقيقتين و بعدين بحط شوية ملح و فلفل و كوبايتين شوربه سخنه . اول لما كل حاجه تغلي بوطي النار و بغطي الحله و اسيبها نص ساعه .

بعد نص ساعه و اول لما اللحمه تستوي ،. بشيلها من الحله و بحطها في طبق و اغطيها .

الخضار اللي في الحله بحط عليه معلقه كبيره كايبرز Capers و شريحتين انشوجه ( ممكن الاستغناء عنهم و نحط معلقه صغيره جوزة الطيب )
في الخلاط او الهاند بليندر بضرب كل حاجه مع بعض و يبقى ده الصوص اللي بيتحط ع اللحمه .

*الجزر *
بغسل الجزر و اقطعه على اربعه و حطيت عليه نقطة زيت، بابريكا و ملح .

*البطاطس*
البطاطس الصغيره قسمتها بالنص و حطيتها في الميه و على نار عاليه لمدة عشر دقايق .
بعدين صفيت البطاطس من الميه و حطيت عليها
زيت زيتون، ملح، فلفل، بابريكا، ثوم مفروم ،اوريغانو

حطيت البطاطس و الجزر في صينيه عليها ورق زبده و دخلتها فرن حرارته ٢٠٠ لمدة ٢٥ دقيقه .

*الفاصوليا *
قطعت الفاصوليا و سلقتها في ميه مغليه لمدة ٥ دقايق .
و بعدين صفيتها و حطيت عليها صوص عباره عن :
معلقه كبيره صويا صوص
معلقه صغيره ملح
معلقه كبيره ثوم مفروم
معلقه كبيره خل
معلقه صغيره سكر
معلقه صغيره فلفل اسود
معلقه كبيره ميه
نص معلقه صغيره شطه مجروشه

الصوص ده بحطه ع النار و اول لما يغلي بحطه على نص كيلو فاصوليا و اقلب و برش سمسم ع الوش .

بالهنا

اترك تعليقاً