أثارت الفنانة الجميلة زينة، الكثير من الجدل خلال الساعات القليلة الماضية، بعد أن كشفت عن كواليس تصوير مسلسل “جعفر العمدة”، والذى يُعرض خلال السباق الرمضانى للعام الحالى 2023، وأوضحت بأن الفنان محمد رمضان حمل شقيقتها احتفالاً بعيد ميلادها، وأن الأمر عادى وأنه لم يقصد شئ من حملها، وأن هذا الأمر لا يضر أحداً على الإطلاق.
زينة رداً على منتقدى حمل محمد رمضان لـ شقيقتها: «كان بيحتفل بعيد ميلادها ومكنش يقصد حاجة»
وأكدت الفنانة، أثناء حلولها ضيفة على الاعلامية أسما ابراهيم، والتى تقوم بتقديم برنامج “حبر سرى”، والذى يُذاع عبر فضائية “القاهرة والناس”، وقالت:ـ “اللقطة دي لا تضر أحداً، وكمان الصورة كانت في لوكيشن تصوير مسلسل جعفر العمدة، واختي هى الستايلست الخاص بي، وكانت بتعدل ملابس الفنان محمد رمضان”.
وتابعت زينة:ـ “وأنا ساعتها قلت لـ رمضان إن عيد ميلادها النهاردة وكنا بنهزر، وهو راح شايلها احتفالاً بعيد ميلادها، والموضوع كله كان هزار في هزار، ومكنش يقصد شئ ولا يوجد أي إحراج على الاطلاق”.
وقامت الفنانة خلال اللقاء، بتوجية رسالة لمن وقفوا بجانب طليقها ووالد ابنائها أحمد عز، وذلك في الأزمة التى دارت بينهما، حيث قالت:ـ “بجد إنتوا مين؟، وخلاص بس الموضوع خلص خلاص.. بس إنت وهو وهى مفيش حد له دعوة بينا ناكل بعض إحنا أحرار، ولو حصل وقطعنا بعض في النهاية بينا أولاد، ومفيش حد له دعوة بينا”.
وأضافت زينة:ـ “أنا مقلتش حاجة للاعلام وهو اللي اتدخل في الموضوع، وأحمد شخص محترم وأنا ست محترمة، وياريت محدش يتدخل في اللي ميخصوش، وحياتنا حاجة تخصنا لوحدنا”.
وأنهت الفنانة حديثها وقالت:ـ “أنا بحب أولاي أوي، والأكيد إني كنت بحب أبوهم، ومش هينفع أرتبط بأي شخص آخر وأنا معايا أولاده، وبكرة هيبقوا رجالة ساعتها هقولهم إيه؟..هقولهم حبيت حد تاني غير أبوهم أكيد مش هيقبلوا ده ومش هيسامحوني، وأنا علشان خاطر ولادي أقول أي شئ وأعمل أي حاجة في العالم، ومينفعش أحب حد غيرهم وشغلي ومعنديش وقت أديه لحد غيرهم”.
