أثارت الفنانة يسرا، الكثير من الجدل خلال الساعات القليلة الماضية، بعد أن تحدثت عن سلبيات السوشيال ميديا والتدخل في حياة الفنانين، وأشارت إلى أن الجمهور يحكم على المشاهير دون العلم بالتفاصيل.
وأكدت الفنانة، في تصريحاتها ببرنامج “ABtalks”، والذى يقوم بتقديمة الاعلامى الإماراتى أنس بوخش، وقالت:ـ “الناس بقت بتحكم على الفنان 24 ساعة، وكمان بيطلعونا شياطين على مواقع التواصل الاجتماعى ويقعدوا يصححوا في أفعالنا، والجمهور دلوقتى بقا بيغزوا حياتنا لدرجة إنى بتعب ومش قادرة أبتسم في الكثير من الأحيان، وده عشان بيبقى عندنا ضغوط ومش سعداء طول الوقت زى الناس ما فاكرة، وقبل ظهور السوشيال ميديا مكنش في حد بينتقد فنانة علشان لبست بيكينى، وبجد كان في حرية أكتر من كده وخصوصية”.
وتابعت الفنانة:ـ “إحنا كنا أسعد وعندنا حرية ووقت خاص بينا، ومكنش في حد بيقتحم حياتنا وخصوصيتنا بالشكل ده، ومكنش في شخص بيحكم علينا وبقينا بنتعرض للإنتقاد أكتر دلوقتى، وده عكس اللى كان بيحصل من 40 سنة فاتت، وحقيقى بدأت أعانى من السوشيال ميديا لدرجة إن الناس بتصورنى وأنا باكل وبينشروها..طب عاوزة أفهم ليه بتصورنا وإحنا بناكل؟.. ياريت تسبونا في حالنا، ومحدش يقتحم حياتنا بالشكل ده؟”.
وأوضحت يسرا:ـ “وفى ناس بتقص الكلام وبتاخد كلمتين ملهمش علاقة بالموضوع اللى بتكلم فيه وبينشروه، وده بجد ميصحش على الأقل بالنسبة للأخلاقيات وآداب السلوك، بجد دى مش مرتبطة بشخص مُتعلم ولا لأ، ولكن هى دى طبيعة البشر”.
وأنهت الفنانة بسرا حديثها وقالت:ـ “وفى النهاية أنا اللى إخترت الشهرة، ولازم أتحمل أضرارها وعيوبها ومش لازم ألوم على حد تانى، وده عشان بحب اللى بعمله وبحترمة، وكمان أنا مدينة للناس اللى بيحبونى، ولكن بقولهم سبولى وقت علشان أقدر أكمل، وبجد المفروض يكون في تقدير للخصوصية أكتر من كده”.