“بنتى قالتلى إنسى إن ليك بنت إسمها بوسى وعملت لى بلوك ومش عارف أتصل بيها”.. أهم تصريحات “محمد شعبان” والد بوسى

صرح والد المطربة بوسى السيد “محمد شعبان:، بأن المنزل الذى يسكن فيه منزل زوجته غير أدمى بالمرة، وبعد أن ماتت زوجته قال له إبنه بأن يعيش في هذه الشقة والتى يكون إيجارها بسيط بحيث يستطيع أن يدفع قيمته، وهو يُقيم فيها منذ 4 سنوات، ويقوم على خدمة نفسه، وأكد أنه يُعانى من أمراض مختلفة بالصدر، ويتناول الكثير من الأدوية حتى يستطيع أن يتنفس بصورة طبيعية.

وأوضح “شعبان” من خلال بث مباشر مع جريدة الوطن، وذلك من داخل شقته البسيطة بأن إبنته إنقطعت عنه منذ 5 سنوات حيث قال:ـ “فى الأول لما كان إبنى شغال معاها كانت بتبعتلى فلوس، وبعدين منعت الفلوس اللى كانت بتبعتها، وكمان كرشت أخوها اللى كان بيشتغل عندها سواق وهو صاحب عيال، وعلى فكرة أنا ساكن بالدور الخامس ومن الصعب عليا طلوع ونزول السلم، وأنا على طول بنزل أجيب فول وطعمية لنفسى، وكمان في ناس كتير بتساعدنى أجيب العلاج”.

وتابع:ـ “وأنا مفيش حد من ولادى بيساعدنى، وبنتى بوسى أخر مرة سألت عليا لما كُنت بسجل مع قناة بعتتلى 2000 جنيه، وإتصلت عليا وقالت بص يامحمد ياريت تنسى إنى ليك بنت إسمها بوسى، وأنا فعلاً نسيت ومن ساعتها إنقطعت عنى وكمان عملت بلوك لرقمى ومش عارف أتصل عليها لحد دلوقتى”.

وأكمل:ـ “وعلى فكرة أنا لسه بحبها دى بنتى، ويارب يصلح حالها، وأنا طلقت والدتها وهى لسه صغيرة بس كُنت بصرف عليهم، وأُمها كانت بتاخد نفقة منى علشان كُنت بشتغل وحالتى كويسه، ودلوقتى الناس بتساعدنى وبتبعتلى الأكل وطول شهر رمضان اللى فات كان في واحد بيعدى عليا ويجبلى فطار، وولادى معملوش زى مهوا عمل، وولادى معذورين علشان حالتهم المادية مش كويسه”.

وتابع والد بوسى:ـ “الموتور بتاع الغسالة إتحرق ومش عاف أصلحه، وبغسل الهدوم على إيدى كل شهر، وأنا صعبان عليا نفسى أوى وده علشان أنا معمتلتش حساب ليوم زى ده، وكمان إبنى مش بشوفه غير مرة في الشهر، وكان بيدفعلى إيجار الشقة ودلوقتى لأ”.

وأنهى:ـ “ولادى كلهم قاسيين زى ما أكون زرعت في قلوبهم الحقد، ومش بوسى بس اللى غلطانه الكل غلطان محدش بيسأل عليا، بس بوسى معاها فلوس ومش بتسأل ومفيش حد من ولادى بيرن عليا، والناس كلها عارفه بأن كل اللى إشتغلت بيه صرفتوا على ولادى ومعنتش حاجة ليوم زى ده”.