كشفت المطربة الجميلة شيرين عبدالوهاب، عن كواليس زيارتها للفنان فضل شاكر والمطلوب قضائياً في مُخيم “الحلوة” بلبنان، الأمر الذى عرضها للكثير من الانتقادات، وأيضاً التحقيق معها.
وأكدت الفنانة، أثناء مداخلة هاتفية مع الاعلامى عمرو أديب، والذى يقوم بتقديم برنامج “الحكاية”، والذى يُذاع من خلال فضائية “mbc مصر”، وقالت:ـ “أنا والفنان فضل شاكر أصدقاء من زمان وفى أصدقاء مشتركين كتير، وبقالنا أكتر من 10 سنين بنتواصل مع بعض عن طريق التليفون، وفى صديق إقترح إننا نروح نزوره، وإحنا سألنا إن ده صح رد علينا وقال عادى بس لازم ناخد تصريح من الدولة، وأخدنا التصريح وروحنا، وبجد كانت سهرة جميلة أوى وبعدها مشينا على طول”.
وأضافت شيرين:ـ “وفى تانى يوم حد طلبنا من جهة أمنية، وسألونا كام سؤال بمنتهى الذوق والأخلاق وردينا عليهم، وبجد أنا مكنتش فاهمة هما مش حابين إن الزيارة تتم، وده علشان ممنوع بس أنا مكنتش عارفة”.
وقامت الفنانة، بالرد على التعليقات السلبية التى كُتبت عن زيارتها لـ فضل شاكر وقالت:ـ “فى ناس كتير إتكلموا وفسروا الموضوع تفسيرات كبيرة وأنا مليش علاقة بيها، وساعتها كنت حاسة إن في ناس قاعدة تحضر ليا المصائب، وبيادة الجيش اللبنانى على راسى من فوق، وأنا صرحت بكده في الحفلة اللى إتعملت من كام يوم بالكويت”.
وأما عن الفنان فضل شاكر قالت:ـ “هو زى الفل، وبجد صوته جميل زى ما هو ودلوقتى بيحضر لحاجات حلوة أوى هتعجب الناس، وبجد كانت من أحلى وأجمل سهرات عمرى”.