رنا سماحة رداً على تصريحات زيزى عادل: «رغم إختلاف ديانتنا كنا بنصلى مع بعض في ستار أكاديمى»

قامت الفنانة الجميلة رنا سماحة، بالرد على تصريحات المطربة المعتزلة زيزى عادل، بخصوص البرناج الشهير “ستار أكاديمى”، حيث وصفته بأنه لا يتوافق مع عادات وتقاليد الشعوب العربية.

وأكدت الفنانة أثناء تصريحاتها مع القاهرة 24، بأن الموسم التى شاركت فيه ليس نفس الموسم التى شاركت فيه المطربة زيزى، وعلقت قائلة:ـ “الإدارة والقواعد كانت بتختلف من موسم لآخر، ولكن كانوا بيأكدوا علينا إننا نلبس ملابس غير مكشوفة على المسرح”.

وتابعت الفنانة:ـ “وكمان مفيش حاجة اسمها كاميرات في الحمام، وده على مختلف المواسم سواء اللى شاركت فيه أو في أى موسم آخر، ولكن الأحواض اللى بيتغسل عليها الأيدى هى الى كانت عليها كاميرات، ولكن داخل الحمامات لأ الكلام ده مش صحيح بالمرة”.

وأوضحت رنا:ـ “وبجد التجربة دى بالنسبة لأى حد مهمة جداً، وده عشان البرنامج كبير ومهم، وأى شخص شارك فيه أضاف ليه، واللى شايف إن البرنامج ضد عادات وتقاليد وأخلاق المجتمعات العربية مكنش المفروض يدخل من الأول، وجمهورنا من كل أنحاء العالم سواء داخل الشرق الأوسط أو خارجه، وفى مجتمعات منغلقة أكتر مننا ومع ذلك متابعين البرنامج”.

وأضافت الفنانة:ـ “إنتى هتفرضى على الناس صورتك تظهر بأى شكل، وهل هتكونى مثال كويس للبنت العربية ولا مثال سئ؟، والناس تقول ما تمثلناش وأكيد في إختلاف من شخص لآخر، وكلنا على رغم إختلاف ديانتنا كنا بنصلى داخل الأكاديمى”.

وأما عن رأيها في إعتزال الفنانة زيزى عادل الغناء قالت:ـ “الإعتزال حرية شخصية، وده علشان ده من حق أى شخص يكمل ولا لأ، ولكن أنا برفض المزايدة على الغير، وأنا لو مش عاوزة أمثل لآى سبب فده من المفروض حاجة بينى وبين نفسى، ومش هينفع عشان أنا قررت إنى معملش حاجة إنى أقول للناس إنها وحشة، وكمان أغلط فيهم وأقلل من شأنهم أو أزايد على اللى بيعملوه”.