صرح الراحل نور الشريف، بأنه من الضرورى أن يكون الفنان متعلماً، وأشار ‘إلى أن أى فنان غير مُتعلم يظل واقف مكانه دائماً، ولا يستطيع ان يتقدم إلى الأمام، ولا يتمكن من أن يُبدع في مجاله.
نور الشريف في حوار سابق عن العمل بالفن: «الموهبة وحدها مش كفاية»
وأكد الراحل، في لقاء سابق له مع الاعلامى الراحل مفيد فوزى، وقال:ـ “ضرورى أوى يكون الفنان منا مُتعلم ومُدرك ما يدور حوله، ويكون فاهم المذاهب المُتنوعة ومُلماً بالعصر الذى يعيش فيه، ومُطلعاً على ما يدور حوله بالعالم، وده علشان يقدر يواكب الأحداث وإلا هيفضل واقف مكانه، ومش هيتقدم خطوة نحو الأمام”.
وتابع الفنان:ـ “الشهادة أمر ضرورى، وده علشان هى بتفرق بين مُمثل مُتعلم وواحد تانى مش مُتعلم، ومش حقيقى خالص الكلام اللى بيتقال إن الموهبة وحدها تكفى، وده علشان الفن علم مركب جداً، وللأسف الشديد عندنا في مصر صعب أوى نقول على شخص إنه محترف كامل، وإنه مُمثل بمعنى الكلمة”.
ومن جانبها، فقد تحدثت الفنانة بوسى في حوار سابق لها، عن علاقتها بزوجها الراحل نور الشريف، وأكدت على ضرورة وجود عامل مشترك يجمع بينهما وهو العمل بالفن، الأمر الذى سهل عليهما حياتهما الزوجية بصورة كبيرة.
وعلقت قائلة:ـ “لو أنا ست عادية مش هقبل إن جوزى طول اليوم يكون بيشتغل، وكنت هطالب بحقى فيه وإنى على الأقل هطلب منه إنى أخرج معاه مرة أمرتين في الأسبوع، وطبعاً ده مش موجود دلوقتى لأننا شغالين في نفس المجال وكل شخص فينا عارف ظروف التانى، وعارفين قد إيه المهنة دى مُتعبة أوى”.
وأنهت بوسى حديثها وقالت:ـ “الراحل كان بيلبس هدومة ويخرج على شغله الساعة 2 بالليل، وطبعاً مفيش ست كانت هتوافق على كده لو ست عادية، وحالياً أنا بشتغل مسرح وبرجع الساعة 3 بالليل، وهو بيكون نايم وهو بينزل بدرى وأنا بكون نايمة، وبجد فضلنا 3 شهور على هذا الحال ومش بنشوف بعض غير في يوم الأجازة”.
