جمال عبدالحميد ينفى تصريحاته عن عادل إمام: «مجبتش سيرة الزعيم.. ده تاريخ بلدنا»

كشف المخرج المعروف جمال عبدالحميد، عن حقيقة ما تم تداوله من تصريحات له عبر مواقع التواصل الاجتماعى، بخصوص أقاويل منسوبة له ضد الفنان عادل إمام، وذلك خلال الندوة التى أُقيمت بمعرض الكتاب، وأكد بأنه لم يذكر أى إساءة للزعيم، وأن ما تم تداوله ليس له أى أساس من الصحة.

وأكد عبدالحميد، في تصريحات له مع القاهرة 24 وقال:ـ “كل الكلام اللى إتقال كذب، وده علشان مش من الطبيعى أقول كلام زى ده على الزملاء، وبجد أنا زعلان جداً من الناس اللى كانت معايا في الندوة، واللى المفروض كان في أسئلة وأنا كنت بجاوب، وكمان في ناس بتكتب كلام ملوش لازمة، والناس بقت تقول إزاى مخرج بحجمه يقول كلام زى ده”.

وتابع جمال:ـ “وأنا مجبتش سيرة الزعيم نهائى، وقولت إن رياض الخولى كان مصور فيلم طيور الظلام، وبعدها قعد سنة مشتغلش وأخدته في بطولة مسلسل حباً فيه كفنان، وهو ده بس اللى أنا قولته ومذكرتش إسم عادل إمام، وخصوصاً إنوا صديق وموهبة صعب إنها تتكرر في تاريخ بلدنا”.

وتابع المخرج:ـ “الندوة كانت عن صلاح جاهين، وأنا إتكلمت عنه فترة طويلة، وده علشان هو كان صديقى وحبيبى، وفى ناس بتقول إنى إتكلمت عن زملائى بالوسط الفنى، وبجد ناس معندهاش وعى وكدابين”.

وجديراً بالذكر، بأن المخرج جمال عبدالحميد يُعد من أبرز المخرجين بمصر والوطن العربى، وشارك في تقديم مجموعة كبيرة من الأعمال التليفزيونية، والتى حقق من خلالها الكثير من النجاح، ومن أشهر ما قدمه “ارابيسك، وزيزينيا، وحلم الجنوب، وريا وسكينة”، وغيرها الكثير من الأعمال.