“إنت راجل كداب يعنى أنا كنت عايشة عيشة الكـ.ـفار”.. ابنة سعيد صالح توجه رسالة لأحد رواد السوشيال ميديا

قامت هند سعيد صالح بالرد على منشور لأحد رواد موقع التواصل الاجتماعى “فيس بوك”، والذى قام بالهجوم عليها وأشار من خلال المنشور إلى أن حياة ابنة الراحل تغيرت كثيراً بعد مرض والدها وتقربه إلى الله تعالى.

وقامت بنشر بوست لها من خلال صفحتها الشخصية على موقع “فيس بوك”، وعلقت قائلة:ـ “مساء الخير عليكم كل أحبابى ومُتابعى، أولاً أُقسم بالله العظيم أنا معرفش مين طه السيد ده، وثانياً معهد السينما ما بيخرجش اعلاميين، وثالثاً الفنانة ريهام عبدالغفور مش خريجة معهد سينما، ورابعاً الأُستاذ أحمد الجندى حى ربنا يبارك في حياته ويرحم والديه، وأخيراً مفيش قسم اسمه الاخراج والسينارويو والحوار في مكان واحد، والاستاذ الاعلامى… مفيش بينى وبينوا صديق واحد”.

وأضافت ابنة الراحل سعيد صالح:ـ “معرفش ده دخل معهد السينما إمتى؟، ومفيش حد بينى وبينوا، وأكيد لو دخل قبلى أو بعدى كنت هعرفه علشان المعهد من يوم ما فتح لحد دلوقتى أوضة وصالة، حضرتك عاوز توضح إيه من خلال البوست بتاعك؟.. إن ربنا هدانى بعد ما كنت عايشة عيشة الكفار؟، وهو انت أو غيرك مطلوب منى إنى أوضح لهم تصرفاتى، وبرغم من كده والله إنت شخص كداب من أول كلام كتبته لحد الآخر”.

وأنهت:ـ “وكمان مش بس كداب.. إنت بجح ووقح وقليل الأدب علشان تكتب بوست بالشكل ده لدرجة إنك سايب بابليك، وكمان فاتح التعليقات على قد ما دعيت عليك.. على قد ما بوجهلك الشكر على كمية الحسنات اللى أخدتها من وراك، وده من غير ما أبذل أى مجهود نهائى”.

وجديراً بالذكر، بأن أحد رواد السوشيال ميديا قام بنشر بوست من خلال صفحته على “فيس بوك”، وقال:ـ “دى زميله لى بمعهد السينما هند البنت الوحيد للراحل سعيد صالح، وهى كانت في قسم المونتاج وأنا في قسم اخراج وسيناريو وحوار، وكانت عايشة حياتها بالطول والعرض، وفى 2006 وبعد مرض أبيها هداها الله وبقت إيه.. صلاة وصوم وعبادة، وبقت أُم صالحة وبتزور قبر أبيها وعائلتهُ وبتعطف عليهم، وانطبق عليها قول الله (إنك لا تهدى من أحببت ولكن الله يهدى من يشاء)، ويارب بارك لها في زوجها واولادها”.

وأنهى:ـ “هند زميلتى وكان معانا المرحوم أحمد محمود الجندى، ورابعنا الفنانة الجميلة ريهام عبدالغفور والخامسة نجلاء محمود الحدينى ابنة الفنان محمود الحدينى ووالدتها الفنانة نادية رشاد هما دول كانوا زمايلى بالمعهد، وهند سعيد صالح كانت في قسم المونتاج”.