صرحت أُسرة الراحل الشيخ محمد متولى الشعراوى، بأنها ستقوم بإتخاذ كافة الإجراءات القانونية ضد الناقد الفنى المعروف طارق الشناوى، وذلك بخصوص تصريحاته الأخيرة وإنتقاده لأفكار الشعراوى، حيث وصفها بالرجعية والتخلف.
وأكدت زوجة محمد الشعراوى حفيد الراحل محمد متولى الشعراوى، في تصريحات لها مع القاهرة 24، وقالت:ـ “الأُسرة أجمعت على إتخاذ إجراء قانونى ضد طارق الشناوى، بعد تصريحاته الأخيرة والقانون هو اللى هيقول كلمة، وهو الناس بقت تتكلم لما الشيخ مات ليه؟، الناس دى كانت فين وهو حى يُرزق، ولا هو أى شخص عاوز يتشهر يطلع يهاجم الشيخ وخلاص، ويقعد يجيب في سيرته على الفاضى والمليان”.
وأضافت:ـ “قررنا إتخاذ إجراء ضد الشناوى، وده علشان الناس بقت بتستسهل الكلام ده، وبقوا مفكرين الكلام ببلاش، ولكن إحنا بنرد ونقول الكلام لازم يكون بحساب، ومفيش حد صغير وكل شخص عارف هو بيقول إيه، وإحنا كان المفروض ناخد القرار ده من زمان من أول كلمة غلط إتقالت في حق فضيلة الشيخ”.
وأنهت زوجة حفيد الشعراوى:ـ “الشيخ مش محتاج حد يطلع يشوه سمعته أو يتكلم عليه، ولا ينفع شخص يتكلم عليه بالزور، وده علشان هو قيمة وقامة، وبجد هل الشيخ الشعراوى كان رجعى؟.. لدرجة إن واحد زى طارق الشناوى يقول عنه الكلام ده؟، وإحنا مش موافقين على أى كلمة هتتقال والشعراوى رحمه الله تاريخه يتكلم عنه”.
وجديراً بالذكر، بأن الناقد الفنى طارق الشناوى كشف في تصريحاته مع القاهرة 24، عن رأيه في تقديم سيرة الراحل الشعراوى على خشبة المسرح القومى، وعلق قائلاً:ـ “من الأنسب تقديم عمل يتحدث عن سماحة وعصرية الدين الاسلامى وارتباطه بالآخرين، وبجد الوقت اللى إحنا فيه ليس مناسب للحديث عن سيرة الشعراوى علشان أفكاره الرجعية”.
وتابع الشناوى:ـ “وبالرغم من إجتهاده والقاعدة الجماهيرية التى يمتلكها فإن له آراء رجعية، وأنا شايف إن ده مش وقت عمل للشيخ، وده علشان الشعب بيتراجع في أفكاره وتحرره”.
