قامت الفنانة المعروفة عارفة عبدالرسول، بالكشف عن كواليس علاقتها بعائلتها، وقرارها في توزيع ميراثها وهى حية تُرزق، وعلقت على منتقدى صورتها بالمايوه، وكشفت عن الكثير من الأسرار عن حياتها الشخصية لأول مرة.
عارفة عبدالرسول: «فى مجال الفن بنسلم ونبوس عادى ومفيش غيرة بينى وبين جوزى»
وأكدت الفنانة، أثناء استضافتها ببرنامج “كلام الناس”، والتى تقوم بتقديمة الاعلامية ياسمين عز، والذى يُذاع من خلال فضائية “mbc مصر”، وقالت:ـ “إشتغلت في حاجات كتير قبل العمل بالفن، واشتغلت مع والدى في محل بقالة في الإسكندرية، وكنت باخد مرتب وبجيب بضاعة”.
وتابعت الفنانة:ـ “وبعدها والدى فتح محل كوافير واشتغلت فيه فترة، ولكنى فشلت علشان المحل في وسط سوق شعبى، وكان صعب البنت تطلع من الكوافير في منطقة زى دى، وكمان وأنا بدرس بالجامعة إشتغلت مندوبة تأمين، ودع علشان أنا إتعودت أصرف على نفسى، ودايماً كنت بدور على شغل”.
وأضافت عارفة:ـ “أنا متجوزة من 44 سنة، وبجد الفترة دى مكنتش سهلة، ومرينا بمشاكل وصعوبات وكفاح، ولكننا كنا أصحاب قبل ما نكون زوجين، وحقيقى إننا بنحب التمثيل وأول ما إتخرجنا اشتغلنا في المسرح، وأوقات الحياة كانت بتبقى صعبة، وأكيد كان بيحصل بينا خلافات ومشاكل، ولكننا كنا بنتصالح بفنجان قهوة، وبقول له يا أُستاذ وهو بيقولى يا أُستاذة في الشغل”.
وتحدثت الفنانة خلال اللقاء، عن توزيعها للميراث وهى على قيد الحياة، وقالت:ـ “أنا بربى ولادى على الحب والتعاون، وده علشان إبنى أكبر من أُخته بـ 6 سنوات، وطول عمرى مش بفرق بينهم وبساوى بينهم في كل حاجة، وعرفت إن في حاجة في الدين اسمها هيبة، وإنى ممكن أهب الميراث ليهم وأنا عايشة، ولكن مرات ابنى قالت ليا إن الشرع بيقول للذكر مثل حظ الأُنثيين؟، وأنا قولت مش قاصدة إنى أخالف الشرع، وعاوزة أساوى بينهم بالنص”.
وقامت الفنانة، بالتعليق على مُنتقدى صورها بالمايوه، والتى سبق وأن نشرتها من خلال حسابها الرسمى على موقع التواصل الاجتماعى “فيس بوك”، وقالت:ـ “أنا بسيطة بطبيعتى ومن الاسكندرية، وإتعودت إنى أنزل البحر وإلا هيجيلى إكتئاب، ونزلت صورى بالمايوه، وبجد كنت في منتهى السعادة، واللى كان باين منى كتفى وبس، ولقيت ناس كتير بتعلق وبتقول إتلمى شوية يا وليه عيب إزاى تلبسى بكينى.. هو فين البكينى؟، والناس نصحتنى إنى أشيل الصور وأنا مش مُقتنعة”.
وأنهت حديثها، وتحدثت عن الغيرة بينها وبين زوجها وقالت:ـ “مفيش بينى وبين جوزى غيرة، بالعكس هو لو شاف واحدة جميلة وقالى بقوله أه فعلاً جميلة، وإحنا في مجالنا عادى بنسلم وبنبوس بعض، ولكن مينفعش نطول في النظرة والسلام، وده علشان ساعتها بحس إنى في حاجة غلط”.
