أحمد السبكى مهاجماً ريهام عبدالغفور وروبى: «أنا مش بيهمنى من أى حد ومش دول اللى يتعملهم بطولة»
قام المنتج أحمد السبكى، بالتعليق على اعتذار الكثير من أبطال مسلسل “رمضان كريم 2″، وذلك بخصوص مشاركتهم بالجزء الثانى من العمل، والذى من المُقرر له أن يُعرض خلال السباق الرمضانى للعام الحالى 2023.
وأكد السبكى، من خلال مداخلة هاتفية ببرنامج “حديث القاهرة”، والذى يُذاع عبر فضائية “القاهرة والناس”، وقال:ـ “كان في شخصيات في الموسم الأول، ولكن دلوقتى بقوا نجوم واعتذروا، ويمكن يكون ده علشان العمل الجماعى بيكون صعب، الاستاذة ريهام عبدالغفور وسهر الصايغ وروبى اعتذروا لكن جينا أفضل منهم”.
وتابع المنتج:ـ “والناس اللى جبناهم أحسن منهم وعملنا شغل أحسن والمسلسل ده مطلب جماهيرى والجزء التانى ظهر بشكل أفضل، وأنا كـ أحمد السبكى مش بيهمنى من أى حد، ولكن للأسف الشديد القنوات إديتهم حجمهم وعملتلهم بطولة لوحدهم.. أكيد مش دول اللى يتعملهم بطولة لوحدهم، وأنا مش عاوز أتكلم ولا أفتح لأنى لو إتكلمت هقول كلام كتير”.
وأضاف السبكى:ـ “والجزء الأول مطلب جماهيرى والناس كلها متبعاه في البيوت وبيسموه مسلسل الكنبة، ولكن الجزء التانى جميل أوى والقناة اللى مخدتهوش هتندم مع احترامى يعنى، والبطولة الجماعية بيكون ليها شكل تانى وعملنا حاجات كتير ونجحت بشكل رهيب، ولكن للأسف في مُمثليين كتير مش بيفكروا صح، وبجد إحنا مش عاوزين نحرق إحنا عندنا 45 فنان في العمل وإن شاء الله ينجح ويكسر الدنيا، وبجد الناس هتتحضك وتتبسط أوى”.
وجديراً بالذكر، بأن الجزء الثانى من مسلسل “رمضان كريم” قام ببطولته مجموعة كبيرة من نجوم الفن أبرزهم “بيومى فؤاد، وسيد رجب، وسلوى عثمان، ونجلاء بدر، وإنعام سالوسة، وويزو، ورانيا فتح الله، وشريف حسنى، ونهى صالح، وكريم الأبنودى”، وتدور أحداث العمل، في إطار اجتماعى كوميدى شعبى حول عادات الأسر المصرية في الحارات الشعبية خلال شهر رمضان، والعمل من تأليف أحمد عبدالله ومن إخراج سامح عبدالعزيز.
