الرسام مصطفى نشأت لنجوم مصرية: “رسمت عبله ليزا”

مصطفى نشأت
مصطفى نشأت

الرسم فن من الفنون المتعددة ومن أقدمهم، حيث يخرج الرسام أو الفنان أفكاره وثقافه عن طريق الرسم، فالفنان يعتبر الرسم أداة للتعبير عما يريد بالشكل الذي يراه عقله ويخرجه في صورة معبرة، فالفنان يستخدم كل ادواته وموهبته وأيضًا يستخدم الأحداث المحيطه بيه والبيئة الخارجية، ليخرج لنا في النهاية لوحة فنية تعبر عما يشعر بيه ويراه في عقله الباطن.

ضيفنا اليوم هو فنان النجوم، صاحب الريشه المعبرة، الفنان المصري مصطفى نشأت، في حوار خاص مع نجوم مصرية…

اولًا / من انت لمن لا يعرفكك؟

مصطفى نشات
مواليد محافظه البحيره مركز ايتاى البارود
٢٥ سنه
اتخرجت من كليه الحاسبات و المعلومات

مين كان بيشجعك ؟

الرسم بحبه من صغرى من و انا لسه فى ابتدائى، و اللى حببنى فيه اختى الاكبر منى لانها كانت بترسم هى كمان.

لما دخلت المدرسه مُدرسه الرسم، اكتشف انى برسم حلو و كانت مهتمه بيا جدًا و دايمًا كنت باخد مركز اول فى الرسم على مستوى الاداره،
ودايمًا كانو المدرسين يشوفو رسمى ينبهرو بيه و كانو بيقولولى دايمًا يا فنان.
كان الرسم اول اهتماماتى من صغرى، لدرجه انى كنت بحوش من مصروفى علشان اشترى ادوات رسم.
و كان نفسى جدًا ادخل كليه فنون جميله بس معرفتش، ودخلت حاسبات و لما دخلت حاسبات قررت انمى موهبتى و اتعرف على ادوات رسم جديده، لدرجه انى كنت بروح كليه فنون جميله جامعه اسكندريه علشان اسال طلبه فنون بتجيبوا الادوات منين، و فى مره من المرات دخلت حضرت معاهم محاضره الدكتور قالى انت مين انا اول مره اشوفك  قلتله انا بحب الرسم جدًا و عايز احضر معاكم، طبعًا موافقش و قالى روح احضر فى حاسبات و اهتم بكليتك افضل.
روحت اشتريت ادوات و قررت انمى موهبتى مع نفسى بجانب دراستى وواحده واحده طورت موهبتى مع نفسى بدون كورسات ولا دراسه رسم.

من اول من رسمته فى حياتك؟

اول بورتريه رسمته فى حياتى كان طفل صغير ابن اختى، عملتله بورتريه بس طبعًا كان بامكانيات بسيطه جدًا جدًا، و لحد دلوقتى محتفظ بيه و بحب البورتريه دا جدا و دايما بقارن بينه و بين اخر بورتريه رسمته.

اصعب صوره رسمتها؟

الرسام مصطفى نشأت لنجوم مصرية: "رسمت عبله ليزا" 1 9/6/2020 - 5:43 م

كانت لست عجوزه بياعه خضار فى السوق، شوفتها عجبتنى ملامحها فرسمتها.
و الصعب اللى كان فيها، إن وشها كله تجاعيد و تفاصيل كتيره.

ايه بيميز لوحه الموناليزا عن غيرها؟

اعمال دافينشى عموما هى الاقرب لقلبى، لوحه الموناليزا من اقرب اللوحات لقلبى، و ممكن اقعد باصصلها ساعه كامله و اسرح فيها من كتر جمالها، و من حبى فيها عيدت رسمها مره تانيه بس عملت دمج بين وشها ووش الفنانه عبله كامل لانى بحبها برضو و هى الفنانه الاقرب لقلبى و سميتها عبله ليزا.

بس غيرت فيها بعض التفاصيل و رسمتها بالقهوه بدل الالوان لانى بحب الرسم بالقهوه جداا و كانت من اكتر اللوحات اللى عجبت الناس و عجبهم الدمج بين موناليزه و عبله كامل جدااا و ناس كتير طلبوا يشتروها منى بس انا رفضت لانى هحتفظ بيها لنفسى.

بنشوفك دايما مع فنانين كتير من الوسط الفنى، مين من الفنانين شجعك؟

الرسام مصطفى نشأت لنجوم مصرية: "رسمت عبله ليزا" 3 9/6/2020 - 5:43 م

كتير جدًا من الفنانين بيحبوا نوع الفن اللى بقدمه، و لما بنزل عمل بيكلمونى و يقولولى رأيهم زى شيماء سيف، مثلا من اكتر الناس اللى بيشجعونى من اول ما ابتديت.

و شريف مدكور، من اكتر الناس اللى باخد برأيهم فى اعمالى و ميرنا وليد و طبعا الفنان احمد سعد اكتر حد بيدينى طاقه ايجابيه لانه هو كمان بيرسم و دايما بناخد رأي بعض فى اعمالنا و العميد احمد حسن طبعا و غاده عبد الرازق، و اروى جوده كتير جدًا.

ايه طموحك فى مجال فن الرسم؟

انى اطور من نفسى اكتر و اكتر لانى طول الوقت بتعلم حجات جديده، وبجهز لاول معرض ليا فى ٢٠٢٠ هيكون فى ساقيه الصاوى.
و حلمى انى افتح اول اكاديميه لتعليم الرسم فى مصر، لان مصر فيها ناس موهوبه كتير بس بيدرسوا حجات تانيه غير الرسم نفس اللى حصل معايا.
فلما افتح الاكاديميه دى هساعدهم انهم ينموا الموهبه دى بسهوله جدًا.

ايه اكتر الاعمال اللى الناس تفاعت معاها؟

اعمال كتير جدا الناس تفاعلوا معاها منهم بورتريه اللاعب محمد صلاح، و الدكتور محمد مشالى الملقب بطبيب الغلابه، و بورتريه اللاعب احمد حسن و بورتريه الفنان محمد حماقى و بورتريه الفنانه عبله كامل و بورتريه الفنانه سعاد حسنى.

مين الشخص اللى مستحيل ترسمه لصعوبه ملامحه؟

انا مستحيل ارسم نفسى، لإنى برسم بروح الشخصيه و الانطباع اللى انا واخده عنها، و اكيد انا مش هاخد انطباع عن نفسى و بالتالى مستحيل ارسم نفسى.