نصيحة ياسمين عز للزوجات: الراجل محتاج يفضل طول الوقت شايف قدامه المُزة بتاعته

أثارت الإعلامية ياسمين عز، جدلًا واسعًا بسبب ما قالته في برنامجها “كلام الناس” الذي يعرض عبر قناة “MBC مصر” حول أسباب الخيانة الزوجية، وتغيير المرأة مع الرجل بعد الزواج.

نصيحة ياسمين عز للزوجات: الراجل محتاج يفضل طول الوقت شايف قدامه المُزة بتاعته

وقالت ياسمين “والله لو اهتميتي بجوزك نص الاهتمام اللي بتديه لغسيل السجاجيد وغسيل المواعين وتنفيض الشيش والشبابيك والبلكونات عمره ما يفكر يبص لواحدة بره غيرك.. واللي انتي مش عارفاه إن الراجل أساسه طفل وكلنا عارفين ده طول الوقت محتاج رعاية واهتمام وحنان زي ولادك بالظبط.. أقولك على حاجة اعتبريه ابنك الرابع وشوفي معاملته معاكي هتتغير إزاي”.

وأضافت: “جوزك دايمًا محتاج يحس بلهفته بخوفك عليه محتاج يحس إن لسه رقم واحد في حياتك.. يحس إن الدنيا كلها ممكن تيجي عليه إلا انتي.. يحس إنك أمه البديلة.. اللي لو طالت تطلع اللقمة زي ما بيقوله من بؤها وتديهاله.. لو طالت تعمل كده تعمل كده.. وفوق كل ده وقبل كل ده هو محتاج يفضل طول الوقت شايف قدامه المُزة بتاعته البنت اللي ساب ستات الدنيا كلها واختارها عشان يكمل معاها حياته فمتخليهوش أرجوكي يندم على اللحظة دي ولا الاختيار ده”.

وتابعت: “مش بقولك تقعدي في البيت تحطي فول ميكب وتنزلي تعملي شعرك كل يوم عشان في ناس إمكانياتها وظروفها ما تسمحش بده ولكن اهتمي بنفسك على قد ما تقدري ع القد زي ما بيقوله وانتي فاهمة قصدي انتوا فاهمين قصدي كويس أوي.. اتزوقي بالمتاح واللي موجود عندك.. ريحتك تبقى جميلة طول الوقت.. مش اللي هو اوعى تدوس ع السجادة اقلع الجزمة بره.. سجادة إيه ما هو جايبها بفلوسه.. أنا مش فاهمة إيه موضوع السجاد ده برضه الموضوع ده بيستفذني كثيرًا”.

واختتمت كلامها قائلة: “نصيحة أخيرة ودي بقى مهمة أوي أوعي تزعقي أو تعلي صوتك لإن وقتها الراجل بيشوفك زيك زيه خليكي دايمًا صوتك واطي وطبعك هادي وبشوشة حتى لو هتمثلي.. وما تبقيش نكدية برضه لإن الست النكدية كتلة نار بتحرق البيت كله”.