ياسمين عز: لو جوزك سباك نقطيه بسكاتك ولو هتفتحي الحنفية يبقى كلامك كله دلع وحنية

كشفت الإعلامية ياسمين عز، خلال حلقة أمس السبت من برنامجها “كلام الناس” الذي يعرض عبر قناة “MBC مصر”، عن طريقة التعامل مع الزوج الذي يعمل في السباكة.

ياسمين عز: لو جوزك سباك نقطيه بسكاتك ولو هتفتحي الحنفية يبقى كلامك كله دلع وحنية

حيث قالت: “لو جوزك يا ست الكل معلم سباك قد الدنيا فانتي في نعمة كبيرة متجوزة فنان بمعنى الكلمة فحاولي تكوني البلسم اللي في حياته اللي بيلطف بيه إيده من المية طول الوقت.. لو جوزك سباك وبتاكلوا الفرخة سوا قوليله خد انت اللحمة يا حبيبي وأنا هاخد الجلدة.. منها جلدة الفرخة ومنها جلدة الحنفية عشان تفكريه بشغله وتفخري بيه”.

وأضافت: “جوزك ده يا مدام حمال آسية بيستحمل في الشغل ما لا يتحمله بشر ورغم كده تلاقيه راضي ومبسوط باللي بيعمله.. شوفي انتي لما حوض المطبخ يتسد عندك ربع ساعة بتكوني مش طايقة نفسك فمابالك بقى باللي مسحول في الشغلانة دي ليل نهار.. جوزك السباك راجل إيده تتلف في حرير.. راجل نفسه حلوة فبتنعكس على روحه وتصرفاته معاكي.. المفروض أول ما يدخل من باب البيت كده تبوسي راسه وتحضريله الحمام وعلى قد تعب كفوفه في شغلانته لازم يبقى في بيته متشال على كفوف الراحة”.

وتابعت: “لو هتكلميه في مشاكل أو ما يرجع من الشغل يبقى الأحسن سدي بؤك بسدادة.. أو تنقطيه بسكاتك.. لكن لو هتفتحي الحنفية وتتكلمي يبقى كلامك كله دلع وحنية.. وخلي أسلوبك معاه دايمًا سالك ومفيش مانع من كام أفيه وكام هزاره كده حلوة وانتوا قاعدين مع بعض.. وبعد ما تخلصه أكل مثلًا تقوليله هقوم أعملك كوباية شاي ع السخان.. السخان اللي هو بيصلحه الصبح يحس كده إن أنتي معاه في الموضوع بعد ما يشرب الشاي قوليله ها يا معلم ها يا أسطى قلبي حبست كويس بالشاي ولا أشوفلك محبس غيره.. شغلي دماغك استخدمي مصطلحات فيها تلاعب بالألفاظ.. الحاجات دي والهزار البسيط ده هيهون عليه تعب اليوم كله والأجواء والظروف الصعبة اللي بيتعامل معاها وهتفضل ذكريات جميلة بينكم تكرروها باستمرار.. أهم حاجة كلمة يا معلم قلبي الغرام تبقى على لسانك على طول إن جوزك حبيبك أحلى أسطى سباك في الدنيا”.