طالبت الإعلامية ياسمين عز، خلال حلقة أمس السبت من برنامجها “كلام الناس” الذي يعرض عبر قناة “MBC مصر” النساء بالمساواة بين الأهل في عزومات رمضان.
ياسمين عز: عزومة أهل جوزك تقيلة على قلبك ليه يا حبيبتي؟ معمولين بسمنة بلدي
حيث قالت: “في رمضان زي ما هتعزمي أهلك لازم هتعزمي أهل جوزك.. مفيش حاجة اسمها أصل عزومتهم بتبقى تقيلة على قلبي.. عزومة أهل جوزك تقيلة على قلبك ليه يا حبيبتي؟ معمولين بسمنة بلدي يا روح قلبي؟ ما هما ناس عادية زيهم زيكم.. أو زيهم زي أهلك انتي.. مامته زي مامتك وأخته زي أختك ومرات أخوه زي مرات أخوكي عادي يعني”.
وأضافت: “وبعدين ده اسمه شهر الخير والرحمة وصلة الرحم والتراحم انتهزيه بقى فرصة وحاولي تصلحي فيه علاقتك بحماتك وعلاقتك بأهل جوزك وبعدين خلي بالك أوعي تفكري إن جوزك مابياخدش باله من التفاصيل دي بياخد باله يعني مثلًا لما هتعملي لمامتك ورق عنب يبقى لازم تعملي لمامته ورق عنب مش فلفل رومي ويبقى اسمه محشي وخلاص.. هتعملي لأهلك رقاق يبقى تعملي لأهله رقاق مش جلاش وتقولي ما هما شبه بعض محدش هياخد باله.. هياخد باله وحماتك أم الفرعون.. الفرعونة الكبيرة هتاخد بالها.. فرعونك صاحي ومركز وواخد باله وبيشيل في قلبه”.
