حل محمود المهدي، طليق الفنانة الشابة منة عرفة، ضيفًا على برنامج “ضرب نار” الذي تقدمه الإعلامية داليا فؤاد، ويذاع عبر قناة “القاهرة والناس” خلال شهر رمضان الجاري.
محمود المهدي يكشف سر المكالمة التي تسببت في انفصاله عن منة عرفة
ووجهت مقدمة البرنامج سؤالًا لضيفها قالت فيه: “حاسس إن انت اتسرعت في الجواز من منة عرفة؟” ليرد عليها قائلًا: “لأ طبعًا خالص.. ومش ندمان بالعكس بحبها جدًا أنا دخلت حياتها وهي دخلت حياتي هي بينت لي حاجات حلوة في حياتي وأنا بينت لها حاجات حلوة في حياتها”.
وأبدت داليا، استغرابها قائلة: “انت بتشكر فيها وهي بتشكر فيك وبتقولوا في بعض شعر وانت متفق على حاجات في علاقتك معاها وفي شغلها وهي موافقة عليها وهي أكيد متفقة معاك برضه في قواعد معينة لشغلك وانت مفهمها إن انت هتبقى مريحها في كل حاجة.. انفصلتوا ليه؟”، ليجيبها المهدي قائلًا: “انفصلنا ليه منة بتحب الفن جدًا وانفصلنا بسبب النقابة.. النقابة كان ليها دور كبير في الموضوع”.
وكشف المهدي، عن سر المكالمة التي تسببت في انفصاله عن منة عرفة، قائلًا: “منة جالها مكالمة بسبب تصريحاتي في النقابة أنا كنت قاعد جنبها مش هقول الشخص مين اللي كلمها بس هي مكالمة م النقابة من غير ذكر أسامي يعني نصحها إن انتي لو فضلتي مع جوزك ده بعد تصريحاته دي انتي مش هتكملي في موضوع الفن”.
ووجهت له داليا، سؤالًا آخر قالت فيه: “مكالمة جت لها إن ابعدي عن محمود صح؟ علشان عامل مشاكل وتصريحاته وكل الكلام ده طب ما هي المفروض ما تبعدش لو حبكوا قوي.. أصل في ناس بتقول ده مجرد شو وتريند جديد وحاجة جديدة سيبنا بعض رجعنا لبعض زي ناس كتيرة بتعمل كده وأعتقد إن انت هتوافقني في الكلام ده ناس كتيرة بدون ذكر أسمائها هما دايمًا أول ما بيلاقوا عندهم الريتش وقع بيعملوا كده سيبنا بعض اكتشفت إن هو خاين الكلام ده كله.. دي مش حركة؟”.. ليرد عليها المهدي: “لأ”.. لتسأله داليا: “مكالمة جت لها إن انت تبعد عنها مكالمة ما جتلهاش إن هو يبطل يطلع في برامج ويتكلم ويقول”، ليرد عليها: “مش هتقدر تجبرني إن أنا أطلع اتكلم لما حد يجيب سيرة مراتي أكيد مش هسكت حتى لو هو مين مش هينفع بس أنا خدت قرار إن إحنا نبعد ننفصل عشان هي بتحب الفن أوي وبتحبني جدًا فأنا راعيت إن هي بتحب الفن ده.. وأنا م الأول لما عرفت منة قولتلها بالعكس أنا هقف معاكي وهبقى في ضهرك وهساعدك وإن شاء الله تتألقي بس تبقى في حدود”.
وأضاف المهدي: “في حاجات مينفعش أقولها دلوقتي لأن هي فعلًا اتأذت بسببي ومينفعش اسبب لها أذى تاني فالموضوع كله حماية ليها بس وده ناس كتير مش فاهماه ومش هعرف أقوله دلوقتي غير بعد فترة كده لما يحصل تغييرات ساعتها في النقابة وحاجات تحصل ساعتها هقدر أتكلم”.
