كشفت الفنانة مروة الأزلي، عن تفاصيل تعرضها للتحرش من أحد العاملين في لوكيشن تصوير أحد أعمالها الفنية، وذلك خلال حلولها ضيفة على الإعلامية راغدة شلهوب، في حلقة أمس من برنامج “نص الكلام” الذي يعرض عبر قناة “النهار”.
وقالت مروة: “أنا عارفة إحساس البنت بيكون إيه لما يحصل كده.. إحساس بالإهانة إحساس إن هي شيء مش إنسانة.. إحساس إن الناس دي مش عارفة أقولك إيه بس هو إحساس مؤلم ومهين.. مهين لإنسانيتك مش بس ليكي كبنت يعني”.
وأضافت: “بس أنا افتكرت الموضوع ده لما كنت بعمل مسلسل رمضان اللي فات (حرب أهلية).. كان فيه من المشاهد إن زوج والدتي بيتحرش بيا.. أنا جه في اللحظة دي أنا افتكرت.. وفي مشهد أنا بحكي لأخويا النجم باسل الخياط وبعيط.. أنا كنت بعيط حقيقي لإني افتكرت المشهد اللي حصلي”.
وتابعت: “أثناء التصوير ده حصل معايا بس الفرق إن أنا في الوقت ده أنا كنت خلاص قوية.. عملت خناقة طبعًا.. حد من اللي بيركب المايك بتاع الصوت.. ويعني هو كانت المساعدة بتاعتي يعني بتجيبلي حاجة قالي أنا هعمله.. لمسني وطلع يجري”.
واستكملت: “اختفى من اللوكيشن والتصوير.. اختفى.. وطبعًا أنا ما سكتش يعني.. بس أنا ساعتها ما سكتش مش زي المرة الأولانية.. هاتهولي وهو راح فين وأجروا وراه وبعد كده عيطت وانهارت”.