لمياء فهمى ترد على شائعة وفاتها بالسرطان: بعد كده لما ينزل خبر وفاتي اللي بجد الناس مش هتصدق

نفت الإعلامية لمياء فهمي عبد الحميد، الشائعات التي انتشرت خلال الأيام القليلة الماضية بشأن وفاتها بمرض السرطان.

وظهرت لمياء، في مقطع فيديو نشرته عبر حسابها الرسمي على موقع التواصل الاجتماعي “فيس بوك” قالت فيه: “مساء الخير عليكم والله أنا ما كنتش ناوية أعمل فيديو بس أنا ركنت العربية دلوقتي ووقفت على جنب عشان أطمن الناس عليا لإن كمية الناس اللي بتتكلم عشان تطمن عليا بعد الخبر السخيف اللي نزل بوفاتي وإن أنا اتوفيت نتيجة مرض الكانسر يعني قولتوا إن أنا عندي كانسر وطلعت وعملت فيديو وقولنا ماشي لكن تموتوني ليه؟ ليه خبر إنا لله وإنا إليه راجعون.. وإن نهاية الإعلامية لمياء فهمي عبد الحميد بمرض الكانسر ليه؟ يعني أنا عاملالكوا إيه طيب.. وجودي عاملكوا إيه؟”.

وأضافت: “عملتوا خبر وقولتوا إن أنا عندي كانسر وخضيتوا الناس وطلعت قولت يا جماعة اتقوا ربنا.. طيب الوضع النهارده أنا نفسي اتخضيت وحياة ربنا يعني أنا لما قريت الكلام وإنه صرح الإعلامي الكبير عمرو أديب بوفاتي نتيجة مرض الكانسر ليه؟ ليه يا جماعة أنا لقيت الدنيا اتقلبت وكمية الناس اللي بتعيط وكمية الناس اللي مخضوضة وأخواتي اللي جايلهم تليفونات بناس عمالة تعيط وأنا الناس اللي عمالة تكلمني وتعيط.. يعني كل اللي عملتوه إن انتوا خضيتوا الناس وقلقتوا الناس وقلقتوا أهلي وخضتوني أنا شخصيًا الكلام اللي مكتوب صعب جدًا جدًا جدًا”.

وتابعت: “يعني بعد كده لما ينزل خبر وفاتي اللي بجد الناس مش هتصدق.. مش عارفة اقولكوا إيه غير الله يسامحكم بجد.. مفيش بني آدم عنده ذرة من الإحساس يعمل كده ده كمان فيديو ومتكلمين في الفيديو.. الجرأة واخداهم إنهم متكلمين في الفيديو وقايلين إنه مع الأسف اكتشفوا المرض عندي.. أنا مقدرتش أكمل الفيديو الحقيقي.. فا فوضت أمري لله.. الله يسامحكم وأنا بجد بشكر الناس اللي اتصلت والناس اللي اتخضت عليا بجد وأنا الحمد لله بخير ولسه يعني لسه عايشة الحمد لله ومش عارفة أٌقول إيه.. والله ما عارفة أٌقول إيه.. مش لاقية حاجة ممكن تتقال.. الحمد لله”.