كشفت الفنانة حورية فرغلي، تفاصيل جديدة بشأن أزمتها مع الإعلامي العراقي نزار الفارس، الذي أدعى خطبتهما.
حورية فرغلي بعد أزمتها مع نزار الفارس: هو عشان عندي مشكلة في مناخيري يحصل فيا كده؟
حيث قالت حورية، في مداخلة هاتفية لها مع الإعلامية أميرة بدر، مقدمة برنامج “ملفات” الذي يعرض عبر قناة “هي”: “أنا مش كويسة وحاسة إني في كابوس من أول امبارح.. حاسة إني عايشة في غابة مش عايشة في دنيا”.
وأضافت: “المذيع ده بقاله أسبوعين بيحاول يعمل معايا لقاء وقالي إنه عراقي.. أنا كنت شوفت لقائه مع رانيا يوسف مرة فقولت له أوكيه”.
وتابعت: “قولنا نصور في البيت.. وقولتله أوكيه أنا ساكنة قدام نادي الجزيرة والمنظر حلو.. فقولت ده كله بيصوروا وضيف في بيتي”.
وأكملت: “في البداية الأسئلة اللي سألها أسئلة غريبة.. وهو جاي كإنه مرتب خطة معينة.. وبعد ما خلص أسئلته قالي بتحبي ماجد المهندس قولتله عادي معرفوش أوي.. فقالي هسمعك أغنية وطلب مني أرقص معاه”.
وأردفت: “كان كل اللي حواليه بيلموا معدات التصوير ومعرفش إن فيه حد بيصور.. ما رضيتش أكسفه ورقصت معاه بعد ما قولتله إن مش هيبقى حلو لإني طويلة ولابسة كعب”.
واستطردت: “ما كانش صريح معايا مش عارفة ليه.. ومش عارفة إزاي يقابل حد وبعد خمس دقايق يقوله عايز يتجوزه.. هو عشان أنا عندي مشكلة في مناخيري أبقى غلبانة ويحصل فيا كده؟.. هو سألني وقالي انتي متجوزة قولت له لأ أنا سينجل ومش فاكرة الكلام ده كان في الحلقة ولا لأ”.
واختتمت حديثها قائلة: “اللي حصل ده أكيد مش اتفاق بينا عشان التريند.. أنا مش محتاجة ده ومش أنا اللي روحت له العراق.. ده شخص كان مريب وأول ما دخل كان عمال يصور كتير.. ومعنديش مشكلة إن الحلقة تنزل عشان الناس تتأكد إذا كنت متفقة معاه ولا لأ”.
