حلت المطربة الشعبية هدى، ضيفة على الإعلامية ياسمين عز، في حلقة أمس الجمعة، من برنامج “كلام الناس” الذي يعرض عبر قناة “MBC مصر”.
المطربة هدى: بيجي عليا أيام ممكن ألغي درس بنتي عشان معييش فلوس
وتحدثت المطربة التي اشتهرت بغناء أغنية “بين نارين” عن الأزمة المالية التي تعرضت لها في حياتها، حيث قالت: “مش فترة معينة أكيد ممكن من وقت للتاني.. مهو أنا بني آدمة عادية زي الناس بيجي عندي ظروف وشوية حلو وشوية وحش ولما بتأخر في شغلي بيبقى أغلبية الوقت عندي مسئوليات تانية وعندي بنتي وعندي زي الناس عندي مصاريف مدرسة وعندي مصاريف دروس وعندي حاجات تاني مسئولة في رقبتي”.
وأضافت: “فلما الدنيا تمشي شوية ويبقى فيه شوية فلوس بتبقي انتي برضه عارفة غنيت بين نارين وبقيت بين نارين.. فانتي تدفعي مصاريف المدرسة ولّا تعملي أغنية.. فمفيش تفكير ومفيش اختيارات هبقى عايزة أدفع مصاريف المدرسة فبالتالي بتأخر فبالتالي يقعدوا يسألوا انتي فين انتي قعدتي انتي مش عارف إيه.. بزعل بس عارفة عشان انتي مقلة أو مش متعلمة حاجة معينة فده بيصبرك شوية يعني فاهماني.. الظروف بس غصب عني بتتلخبط”.
وتابعت: “ساعات بيجي عليا وقت معييش فلوس خالص.. بيجي عليا أيام ممكن ألغي درس بنتي عشان معييش فلوس.. دي مفيهاش كسوف.. ساعات بيجي علينا وقت معييش مليم في البيت.. يعني أنا لو أنا كنت شوفت حد والحمد لله بفضل ربنا الواحد وصل لمكانة كويسة ولو أنا شايفة كده حد بيقولي إن أنا راكبة عربية كويسة قاعدة في بيت كويس وأنا مش معايا فلوس أو مفيش في بيتي مليم أنا مش هصدق بصراحة يعني فعلًا ما بيصدقش إلا اللي بيبقى محطوط في الظروف”.
