قامت الفنانة الجميلة حنان شوقي، بالتحدث عن العلاقات الزوجية، وأشارت بأن العلاقة بين الزوجين يجب أن يسودها الإحترام والحب والمودة والرحمة.
وأكدت الفنانة، خلال تصريحاتها مع القاهرة 24:ـ “الزواج ميثاق غليظ والمفروض يكون فيه مودة ورحمة وأخلاق، والسبب في زيادة نسبة الطلاق الإستعباط اللي بقى موجود بين المرأة والرجل، وكمان العلاقات اللي مش بجد واللي أغلبها بيكون الطرفين بيحاولوا يضحكوا على بعض ومبقاش فيه حد على مستوى المسؤولية.. مش عارفة ليه الناس بتحاول تستهين بهذا الرباط”.
وواصلت حنان:ـ “الأساس في العلاقة الزوجية المودة والرحمة والحب والتفاهم والإحترام، ولو الطرفين داخلين من الأول على نور بيحبوا بعض وبيحترموا بعض، وكل طرف بيحاول يغير من نفسه علشان الطرف التاني.. ساعتها الحياة هتكون مُستقيمة، ولكن للأسف الشديد العكس هو اللي بيحصل وكل واحد بيقول لنفسه يا أنا يا هو، وبكده الحياة بينهم بتتحول لكارثة كبرى، ومفيش حاجة اسمها كده الرجل والمرأة واحد”.
وتابعت الفنانة:ـ “والكارثة الأكبر لو الراجل ضرب مراته وشتمها، وده علشان الحياة بينهم بتتحول لمهزلة، وساعتها المفروض على الست إنها تقف له واقفة جامدة، ولو الست هى اللي تجاوزت بتكون قلة أدب منها وعدم إحترام وتربية”.
وأما عن رأيها في خيانة الزوج لزوجته، ردت:ـ “الراجل اللي يخون مراته يبقى سافل وقليل الأدب ودني، وعلى رأي المثل اللي بيقول من أمنك لم تخونه ولو كنت خاين، وده علشان الزوج بيكون كل حاجة في حياة مراته الأخ والأب والأم والسند في الحياة”.
وعن رأيها حول تقبل المرأة لخيانة زوجها، أجابت:ـ “ده بيكون على حسب العلاقة بينهم في شخص بيغلط ويقول أنا آسف، أو على حسب الصدق والصراحة والود الموجود، ويمكن ده اللي بيخلي الست تقدر تسامح، ولكن لو العكس وإنه بيتعامل مع الست على إنها شئ مهمش ويقول لها كفاية إني متجوزك وساكت، فده بيكون قليل الأدب وسافل”.
وعن مواصفات فتى أحلامها:ـ “ارتباطي ضروري يكون براجل بجد مش دكر، وده بمعنى إنه يكون شخص محترم وصادق ومؤدب ويحترمني، أو بلاش منه أحسن.. مش هعيش كذبة وخلاص، وده علشان مش هقدر أعيش مع واحد شايفاه بيكدب طول الوقت، لأني كده هشيل ذنوب على الفاضي”.
