حلت الكاتبة الكبيرة والنائبة البرلمانية فريدة الشوباشي، ضيفة ببرنامج “سابع سما” الذي تقدمه الإعلامية راغدة شلهوب، ويذاع عبر قناة “النهار” خلال شهر رمضان الجاري.
وتحدثت فريدة، خلال الحلقة عن الزعيم الراحل جمال عبد الناصر، قائلة: “ده أعظم شخصية وأعظم زعيم من ساعة عمر بن الخطاب”.
وأضافت فريدة: “الحب ده كله لأنه كان بيرد على الناس اللي بتتكلم وبتقول الفقرا معلش يتعذبوا.. قالهم بتقولوا الفقرا ليهم نصيب في الآخرة في الجنة.. طب مينفعش الفقرا يبقى ليهم نصيب ولو صغير في الدنيا ينفعكوا انتوا في الآخرة.. في أجمل من كده؟”.
وتابعت فريدة: “خلانا نحس بكرامتنا.. أنا شخصيًا كنت بصلح الحذاء بتاعي 3 مرات في السنة وألبسه هو هو بعد عبد الناصر أنا أشتغلت وكسبت وبقيت عندي شخصيتي وعندي استقلالي وحاسة بإن أنا.. أنا عمري ما أنسى لما لغى الألقاب أمي زغردت.. زغرودة أمي لسه في وداني لغاية دلوقتي.. الإحساس بإن انتي متساوية مفيش باشا ولا بيه أحسن منك.. لأ أنا مواطنة وهو مواطن.. وكان فعلًا عايشين كده”.
وأستكملت حديثها عن عبد الناصر، قائلة: “وبعدين حقوق العمال والفلاحين.. كان في ناس تقولك لأ إزاي ياخد ويدي للفلاحين انت عندك 10 تلاف فدان ولا 1000 فدان ولا 500 فدان هتعمل إيه؟ وواحد تاني معندوش حاجة يزرعها ولا يعملها.. أنا شوفت الفلاحين أنا كان جدي كان م الأعيان كنت بروح عنده وكنت بشوف البؤس بتاع الفلاحين اللي الناس دلوقتي بتقول الملك وأيام الملك حاجة مسخرة يعني”.
وأشارت إلى أنها قرأت الكثير عن عبد الناصر، حيث قالت: “لما روحت فرنسا ما سيبتش كلمة اتكتبت عنه ما قريتهاش راجل بلا رذيلة يعني راجل عظيم راجل كل الصفات الجميلة فيه لا عرفوا يلاقوله حساب مثلًا في البنك ولا عرفوا يلاقوله علاقة مريبة يعني رمز النقاء”.