حرصت الفنانة الكبيرة إلهام شاهين، على تهنئة الزعيم عادل إمام، بعيد ميلاده الـ 82 من خلال فيديو نشرته عبر حسابها الرسمي على موقع “انستجرام” ظهرت فيه وهي تتحدث عن مشوارها معه ودوره في نجوميتها، حيث قالت: “كل سنة ونجم نجوم مصر الفنان الكبير زعيم الفن عادل إمام طيب وبخير.. بحبك من كل قلبي يا عدوله ومش هنسى فضلك أبدًا عليا أولًا أنا أول مرة في حياتي أقف قدام كاميرا أول فيلم في حياتي وأنا في سنة أولى معهد فنون مسرحية كان فيلم (أمهات في المنفى) بطولة عادل إمام”.
إلهام شاهين: عادل إمام قالي انتي إمكانياتك كبيرة
وأضافت: “وكان عندي يمكن 3.. 4 مشاهد قدامه والباقي قدام ممثلين آخرين.. كنت فرحانة جدًا بالمشاهد اللي قدام عادل إمام ويمكن أول مشهد أصوره كان معاه أنا فاكراه”.
وتابعت: “وبعد سنين وأنا بتخرج أو بعد ما اتخرجت مباشرة رشحني النجم الكبير عادل إمام واداني فرصة عمري في فيلم (الهلفوت) طبعًا مع العمالقة أستاذ وحيد حامد والمخرج الدكتور سمير سيف.. كان بالنسبة لي حلم إن يجيلي دور زي ده مع نجم كبير زي عادل إمام والكاتب وحيد حامد وإخراج سمير سيف عمل كبير جدًا جدًا عملي نقلة كبيرة جدًا في حياتي النقلة دي اللي خلقت اسم إلهام شاهين اللي حطتني في مكان من النجومية اختصرت لي سنين كتير”.
ووجهت الشكر للزعيم قائلة: “أنا بشكرك من كل قلبي ومش هنسى فضلك عليا أبدًا ومش هنسى نصايحك إن بعد (الهلفوت) بقى يقولي ما تعمليش أي حاجة انتي ممثلة جامدة و(الهلفوت) كان أول جايزة في حياتي كأحسن ممثلة فلما جيت بعد كده عملت مع الفنان الجميل عادل إمام فيلم (رمضان فوق البركان) قالي ليه قبلتي الدور فاستغربت قولتله ده أنا لو قالولي تعالي بس امشي كده من قدام الكاميرا في فيلم لعادل إمام هاجي قالي لأ أنا بقولك لأ الدور ده كان ممكن أي حد يعمل لإن انتي امكانياتك أكبر أنا ما بنساش كلامه ده قد إيه اداني ثقة في نفسي حتى لو هو مش شايف كده للدرجادي بس الدفعة اللي كان بيدهالي والثقة اللي بيديهالي في نفسي ورأي نجم كبير زيه فيا ادتني فعلًا دفعة لقدام وادتني ثقة كبيرة في بكره والمستقبل”.
واختتمت حديثها عن الزعيم قائلة: “أنا بشكرك من كل قلبي وفضلك عليا لن انساه وفضلك على السينما المصرية وعلى امتاع المواطن العربي في كل مكان مش ممكن حد ينساه”.
