حل الفنان أشرف زكي، ضيفًا على برنامج “العرافة” الذي تقدمه الإعلامية بسمة وهبة، ويذاع عبر قناة “المحور” الفضائية.
أشرف زكي يكشف كواليس تعرض إلهام شاهين للضرب بسببه: انتي عارفة حبي واحترامي ليكي
وتحدث زكي، عن موقف محرج تعرضت له الفنانة إلهام شاهين، بسببه حيث وجه له اتهامًا من قبل “شيخ العرافين” بالبرنامج بأنه كان سببًا في ضرب إلهام شاهين بالقلم ولم تقف بجوارها.
وقال زكي، ردًا على كلام “شيخ العرافين”: “والله برافو عليك.. لأن أنا كنت حابب اتكلم في الموضوع ده.. هو الموضوع أصله بيتعرف بطريقة غريبة شوية.. أنا كنت طالب في المعهد العالي للفنون المسرحية وإلهام طالبة في نفس المعهد دفعة ماجدة زكي أختي وهما كانوا توأم بعض ما بيسيبوش بعض دقيقة يعني يا ماجدة عندها في روكسي يا هي عندنا في العجوزة.. فأنا كانت فيه مسرحية في مسرح بتاع الله يرحمه أستاذنا جلال الشرقاوي اللي هو مسرح الفن فيه حديقة فكنا بنروح نقعد مع زملائنا الطلاب اللي في المعهد في الحديقة لما يكون عندهم استراحة”.
وأضاف زكي: “فأنا كنت رايح اليوم ده لأحمد صيام.. كان زميلي في المعهد فأنا رايح لصيام فكنت داخله الأوضة أقوله حاجة إلهام سمعت صوتي فجت إيه ده.. ده أشرف.. ازيك يا أشرف وماجدة عاملة إيه قولها أنا كنت متأخرة عليها عشان مش عارف إيه هما الكلمتين دول.. حديث عادي.. مع دخلة الأستاذ جلال الشرقاوي فقالها إلهام مش أنا مانع الضيوف.. فهي استغربت يعني أنا مش ضيف.. يعني إحنا عندنا في المعهد لما إحنا بنبقى كلنا بالليل عند حد من زمايلنا ده العادي بتاعنا.. يعني المعهد بالليل تلاقيه في مسرح من المسارح.. فقالت له أشرف يعني وهو عارف بالنسبة لها أنه زي أمير أخوها هو فاهم الحكاية كويس”.
وتابع زكي: “فحصل بقى المشكلة (ضربها بالقلم) ولكن لا أنا وقفت كويس جدًا معاها وأستاذ جلال ظل واخد مني موقف لوقت كبير جدًا ولكن في الآخر إلهام صديقة عزيزة جدًا جدًا وهي بالنسبة لي زي ماجدة زكي عشان أنا شوفت شوية ناس بتهرج يعني.. إلهام شاهين يا إحنا في بيتها يا هي في بيتنا.. إيناس أختها.. أمير.. أيمن”.
واختتم زكي، حديثه في هذا الموضوع قائلًا: “لا أملك غير إني أقوله انت أستاذنا الكبير ومُعلمنا وربنا يرحمه لإنه ترك فراغ كبير جدًا في حياتنا وأنا مش حابب نتكلم على حاجة سبقت وكلن أنا حابب برضه أوضح، موجهًا رسالة للفنانة إلهام شاهين، قائلًا: “حقك عليا أنا وانتي عارفة تقديري وحبي واحترامي ليكي”.
