بسمة وهبة: لو عايزين تعملوا تريند ابعدوا عن فضيلة الشيخ الشعراوي

تحدثت الإعلامية بسمة وهبة، خلال حلقة أمس من برنامجها “90 دقيقة” الذي يعرض عبر قناة “المحور” عن هجوم البعض على فضيلة الشيخ الراحل محمد متولي الشعراوي.

بسمة وهبة: لو عايزين تعملوا تريند ابعدوا عن فضيلة الشيخ الشعراوي

حيث قالت: “الحملة الشرسة اللي ما كناش نتوقعها من المحسوبين على الثقافة والتنوير والنقد بصفة عامة لأنه فوجئنا بالتعرض لمقام عالم جليل ورمز يعرفه المصريين مسلمين ومسيحين بل ويعرفه العالم الإسلامي كله”.

وأضافت: “النهارده بقى بيتنبش في القبور وبيحاول النابش إنه ما يترحمش على الرمز ده بل يجمع له وكإنه قاصد.. يجمعله لقطات من برنامجه ويحط لقطة جنب لقطة عشان يكون رأي عام ضده بيعمل حاجة مكونة من أغلاط ياخد حتة من هنا وحتة من هنا عشان يخلي الناس تكون رأي خاطئ عن مولانا وحبيب الملايين مسلمين ومسحيين فضيلة إمام الدعاة الشيخ محمد متولي الشعراوي الله يرحمه”.

وتابعت: “الشيخ الشعراوي الدولة نفسها بتفخر بيه على فكرة وبتسمع صوته للمسلمين 5 مرات على فكرة في ختام كل آذان أبقوا خلوا بالكوا وركزوا شوفوا الدعاء اللي بعد الآذان ده بصوت مولانا إمام الدعاة الشيخ محمد متولي الشعراوي في إعلام مصر الحبيبة وبرامجه بتجول في كل أنحاء العالم وتاريخه بيشهد إنه وقف ضد الفكر التكفيري وضد المخربين في فترة أو حقبة من حقبات الزمن في السبعينيات”.

ووجهت بسمة وهبة، رسالة شديدة اللهجة لمنتقدي الشيخ الشعراوي قائلة: “انتوا مين عشان تهاجموا الشيخ الشعراوي.. أنا أحب أقولهم بس بقى بس كفاية لحد هنا وستوب وأقفوا عن حدكم التزموا الأدب وما تجرحوش مشاعر المصريين عايزين تعملوا تريند بعيد عن رموز الدين بعيد عن فضيلة الشيخ الشعراوي اللي هيفضل رمز في القديم والجديد وإلى قيام الساعة إن شاء الله”.