ردت الإعلامية ياسمين عز، في حلقة أمس من برنامجها “كلام الناس” الذي يعرض عبر قناة “MBC مصر” على الانتقادات التي تعرضت لها المطربة السورية أصالة، في الساعات الأخيرة الماضية.
ياسمين عز مدافعة عن أصالة: هو عيب إن الست تبوس ايد جوزها يا جماعة؟.. في رجالة كتير تستاهل
وتداول رواد مواقع التواصل الاجتماعي صورة جديدة للمطربة أصالة نصري، ظهرت فيها وهي تُقبّل يد زوجها الشاعر العراقي فائق حسن، مما عرضها للانتقادات والسخرية من قبل البعض.
وقالت ياسمين عز، تعليقًا على الواقعة: “الناس بتتكلم على الصورة وكإنه مشهد غلط أو عيب أو حرام.. واللي تقولها ما تبقيش منبطحة ومنكسرة ورجعية.. واللي تقولها عصر سي السيد أنتهى وما تحسسيهوش إنك ضعيفة ومحتاجاله واللي تقولها بكره تندم يا جميل.. بكره تندمي ويتعمل فيكي زي اللي قبله عمله.. وكلام الحقيقة صعب وخارج.. تعليقات كتير أنا ما ينفعش أقولها على الهوا بنشوفها يعني مش كل حاجة ينفع أقولها”.
وأضافت ياسمين: “فوق كل ده واحدة تقولها بتبوسي إيده على إيه؟ ده مفيش راجل يستاهل لأ بقى على فكرة عايزة أقولكوا إن في رجالة كتير تستاهل.. في رجالة حنينة كتير وكفاية بقى تحاكموا الناس على مشاعرهم وعلى توجهاتهم وعلى هما بيحبوا إيه وما بيحبوش إيه ويعملوا إيه وما يعملوش إيه.. انتي إيه اللي ضايقك حضرتك في إن واحدة بتحب جوزها وبتعبر له عن حبها بالشكل ده وبالطريقة دي.. هو عيب إن الست تبوس ايد جوزها يا جماعة؟ عيب دلوقتي؟ جوزها جوزها مش حد غريب”.
وتابعت: “عايزة أسأل سؤال.. ليه لما بيحصل العكس بنقول الله وحركة واو وشيك وحاجات وحركات.. لما العكس لما الراجل يبوس إيد الست.. لكن لما الست تعملها تبقى مش ملزمة وتبقى كارثة.. مع إني بشوفها حركة فيها كل معاني التقدير والحنية اللي في الدنيا.. الايد اللي بتبوسيها دي هي الايد اللي بتسندك لما بتقعي.. الايد اللي بتطبطب عليكي.. الايد اللي بتساعدك لما بتتعبي.. هي اللي بتحتويكي هي اللي بتجيب لك كل حاجة انتي عايزاها.. هي اللي بتقولك أو بتطبطب عليكي في الحلوة وفي المرة.. الإيد دي هي اللي بتمسك ايديكي وبتعدي بيكي في أي مرحلة وحشة أو صعبة بتمر عليكي ما بيسيبكيش كده ويمشي”.
واختتمت حديثها قائلة: “مرة تانية سيبوا الناس يعبروا عن حبهم لبعض بطريقته براحتهم شجعوا الناس يقدروا بعض ويحترموا بعض ويعيشوا حياة حلوة مع بعض بدل ما تسخنوهم على بعض وتكرهوهم في بعض وتكرهوها في اليوم اللي باست فيه إيد جوزها هي حرة.. تحية طبعًا للفنانة الكبيرة أصالة ولزوجها الشاعر العراقي فائق حسن وتحية للرجل العراقي بشكل عام”.
الله عليك يا ياسمين عز ، أعزك الله ، كلام رائع جدا ، أصالة فعلت ما لم تفعله كثير من النساء بمختلف توجهاتهم العقيدية و الفكرية ، إنه فعل حضاري راقي لا تقوم به إلا امرة صادقة ، و أنا شخصيا لو زوجتي قبلت يدي لقبلت باطن قدمها و الله ، نعم هكذا تكون المرأة رمز الحنان و الحب ، هذه هي المرأة التي يموت الرجل من أجلها و يضعها تاجا على رأسه ، كمال المرأة في حبها لزوجها و إظهار هذا الحب له ، أنا أتكلم عن الرجل و ليس أشباه الرجال ، المرأة اليوم انساقت وراء أفكار تريد تهديم العلاقات و تفكيك الأسر ، فلا المرأة تعيش السعادة و لا الرجل أيضا ، ألا فلنعد إلى أصالتنا التي بها نحيا حياة سعيدة كما فعلت أصالة التي نحييها من هذا المنبر و نقول لها لقد وضعت نفسك تاجا على رأس زوجك .