تحدث الإعلامي عمرو أديب، في حلقة أمس السبت، من برنامج “الحكاية” الذي يعرض عبر قناة “MBC مصر”، عن تعامل رواد مواقع التواصل الاجتماعي مع خبر وفاة الفنان هشام سليم، الذي رحل عن عالمنا صباح الخميس الماضي بعد صراع مع مرض السرطان.
عمرو أديب: هتعملوا فيا إيه لما أموت.. ده أنا هيتعملي حفلة غير طبيعية
وأعرب أديب، عن استياءه من تعليقات البعض على السوشيال ميديا، قائلًا: “عندي لحضراتكم طلب.. والطلب ده آخره علامة تعجب.. هو إحنا ليه ما بقيناش نعرف نسيب الناس تموت في سلام! حد مات بيجوز عليه إيه؟ الرحمة.. إحنا ليه أنا ما أفتكرش السنتين تلاتة اللي فاتوا حد مات وسيبناه في حاله.. إنسان مات كان مريضًا فمات.. في أي حاجة في كده؟ لأ إحنا ما بنسيبش حد يموت في سلام.. قولوا الله يرحمه ونقطة.. هما وأهله عندهم مصيبة أكتر من كده؟ يعني إحنا ناقصين.. يعني أنا لما يكون عندي قريب قد توفى انتوا جرالكوا إيه يا جماعة انتوا بقيتوا متوحشين كده ليه.. يعني الراجل اللي مات الحكم عليه هيفيدك في إيه؟ ماذا سيضيف حكمك عن إنسان مات”.
وأضاف ساخرًا من التعليقات على وفاة الفنان هشام سليم: “لا ده كان عنده مشاكل كبيرة مع عيلته.. لا ده عياله كانوا مش عارف عندهم إيه معاه.. لا ده كان متخانق مع إخواته.. وانت مال أهلك؟ مات.. طب انت تعرف مشاكله كانت إيه؟ هشام سليم توفى وسط أهله.. أنا بقول لحضراتكم وسط أهله.. ومشاكله كلها مع أخواته اتحلت.. الراجل كان عيان بقاله سنتين.. بس ده يفرق معاكوا في إيه إنه اتخانق مع أهله ولا ما اتخانقش.. إن أهله كانت جنبه ولّا ما كانوش جنبه.. ما تسيبوا الناس تموت”.
وتابع: “أنا فاهم إننا ما نسيبش الأحياء ماشي.. وبرضه هتفهم أوي إن لو حد سياسي.. ده راجل بيعمل مسلسلات وأفلام وسينما أنت فارق معاك إيه إنه كان عنده مشكلة مع أخواته.. عنده مشكلة مع عياله ونجيب بقى فيديوهات قديمة ونقصقصها بص شايف ما كانوش مبسوطين.. انت مالك.. إحنا ليه بنعمل في بعض كده يا جماعة.. يا جماعة أنا بقيت خايف أموت خايف أموت والله هتعملوا فيا إيه لما أموت أنا بقى.. أنا عارف أنا هيتعملي حفلة غير طبيعية.. أنا مش عايز أموت خوفًا من الموت.. أنا مش عايز أموت علشان اللي انتوا بتعملوه ده”.
واستكمل: “حد مات الله يرحمه.. الأهل أنا النهارده كنت بكلم ناس من أهله.. الناس بتقول انتوا بتعملوا فينا كده ليه؟ إحنا عملنا لحد حاجة وانت فارق معاك إيه وانت مالك.. فارق معاك إيه إنه مثلًا كانت أخته بتكلمه أو ما بتكلموش قبل ما يموت بشوية.. الراجل مات وسط أهله على حضن أهله المعلومة دي مهمة عندك في إيه؟ لأ أخوه ما صلاش عليه.. انت شوفت؟ ولو ما صلاش انت مالك.. لا لا وهما ما عملوش ليه عزا بالليل؟ مش عايزين نعمل عزا الراجل قال مش عايز عزا.. قولوا الله يرحمه واقروله الفاتحة.. ده راجل كان حبيبكوا وابن صالح سليم كمان يعني الموضوع الكبير كله.. عيلة محترمة وراجل محترم وممثل وفنان جميل وعيلته مين واخواته مين ونسايبه مين حبايبكم كلكم.. يا جماعة لو سمحتوا لما أموت قولوا الله يرحمه بس.. أنا طبعًا عارف اللي هيتعمل معايا.. أنا هيتعمل معايا واجب واجب يعني بس تولعوا”.
