حلت الفنانة عبير صبري، ضيفة على الإعلامية إنجي علي، مقدمة برنامج “أسرار النجوم” الذي يذاع عبر إذاعة “نجوم FM”.
عبير صبري: الخلفة الكتير سبب الجرايم اللي بتحصل
وتحدثت عبير، خلال الحلقة عن الجرائم التي انتشرت في مصر خلال الفترة الماضية، وأبرزها جريمة قتل نيرة أشرف، طالبة جامعة المنصورة على يد زميلها أمام بوابة الجامعة، والإعلامية شيماء جمال، التي قُتلت على يد زوجها المستشار، وحوادث انتحار الشباب والفتيات.
وقالت عبير: “بصي طبعًا وضع محير ومفاجئ لينا كلنا بس أنا بقول دايمًا إن المجتمع اللي إحنا عايشين فيه مجتمع مش شايف مجتمع تاني موجود.. يعني إحنا عايشين في البابل زي ما كان محمد صلاح بيقول.. وفي مجتمع تاني إحنا ما نعرفوش.. المجتمع التاني اللي إحنا ما نعرفوش ده إحنا شوفناه أيام الثورة لما كنا بنشوف أعمال البلطجة والسلاح وإحنا عمالين نقول مين دول.. ففي ناس موجودين إحنا مش عارفين عنهم حاجة”.
وأضافت: “الخلفة الكتير أوي والإنجاب اللي بلا وعي الإنجاب المستند للدعم إن هتعلم ببلاش وأخد بطاقة تموين والعيش ببلاش وده ببلاش وده ببلاش كل ده إنجاب عديم المسئولية إن مثلًا زي ما سمعنا لسه قصة امبارح واحد قتل مراته الست بتخرج تشتغل يا عيني في البيوت وبتصرف على عيالها وهو قتلها واتخانق معاها عشان عايز علبة سجاير وقاعد في البيت ما بيشتغلش وهي اللي بتديله الفلوس وطبعًا في عيال فهي لازم تخرج عشان تصرف على العيال دي”.
وتابعت: “انت بتخلف ليه بتخلف عشان عدد في اللمون انت ما عدتش البيئة الزراعية اللي كانت قبل المرحلة الناصرية اللي هي انت عايز تخلف بالسبع عيال والعشر عيال عشان يساعدوك في زرع الأرض.. انت ما عدتش ده.. في نفس الوقت انت عندك غلاء أسعار رهيب.. في نفس الوقت انت عايز تعلم العيال دي كلها فمش هتعلمهم فهيطلعوا بيشتغلوا في مهن وهو طفل يتعرض لتحرش ويتعرض لعنف ويتعرض لقهر وللهروب بره الأسرة.. طب مين الأم اللي قادرة إنها تقعد تربي خمس ست عيال نفسيًا وتعليميًا وصحيًا مين الأب اللي قادر يصرف ده الأغنيا النهارده ما يقدروش يصرفوا على العدد ده من العيال”.
واستكملت: “الأعداد دي عبر أجيال طلعت معندهاش حلول لمشاكلها.. معنديش حلول طب أعمل إيه محبط منتحر مكتئب مخدرات حقد كراهية تحريض أي حاجة فخلاص دخلتي في إن في كذا جيل عنده المشاكل دي لإنه معندوش حلول”.
