على طريقة أحمد حلمي في ” أسف على الإزعاج ” عمر حسن يرسل رسالة لرئيس الجمهورية

ارسل ” عمر حسن ” الكاتب المعروف رسالة إلي رئيس الجمهورية عبد الفتاح السيسي على الفيس بوك رسالة يوضح فيها مأساة المواطن المصري، ونالت هذه الرسالة على إعجاب الكثير من رواد موقع التواصل الاجتماعي الفيس بوك حيث أحدثت تلك الرسالة ضجة كبيرة ولذلك سوف انشرها لكم.

على طريقة أحمد حلمي في " أسف على الإزعاج " عمر حسن يرسل رسالة لرئيس الجمهورية 1 28/9/2016 - 4:27 م

نصف الرسالة 

عزيزي رئيس الجمهورية
قبل التحيه
وقبل أي كلام بره السياق العام
أنا المواطن فلان
يمكن ماتعرفنيش
مابروحش مؤتمرات
ولا كنت ف الوفد المرافق ليك ف ألمانيا
لا أبويا نائب برلمان سابق
ولا أمي تعرف مطرح الروتاري
ولاعندي فيلا في التجمع بفلوس مناقصات الحكومة
أنا المواطن فلان عادي
وعادي زي الخلق في بلادي
اللي انت تعرفهم ساعة الخطابات
واللي انت بتلف البلاد علشان
تجمع فلوس على كل راس فيهم
أنا المواطن فلان
المالك الأصلي للأرض والمحصول
صاحب غيطان القمح وقناة السويس
وشريك بنسبة ف حصة الغاز الطبيعي
وكل مورد جوه خزنة مصر
لا ليك عليا الجبر ولا السكوت والصبر
ولا ليك ف جيبي جنيه
أنا اللي فضلي عليك
بامشي بكل سلام وبلتزم بالأمر
بدفع ضرايب واروح الشغل ف معادي
ف الحظر بارجع قبل ساعة الحظر
الحاجه تغلى وباشتري ع القد
لا باجي ناحية حد
ولابكسر القوانين
ساكت عليكوا لحد
ما بلغت ادنى الطين
بحارب الطواحين
بكل شيء فيا
حتى اما باكرهكم باكره بسلميه
باصبر ف كل كمين
فيهينني كل أمين
وكإنه له عندي
انا اللي فضلي عليك
وبتشتغل عندي
زيك كأي زميل شغال وظيفه بأجر
الصبح تصحي الفجر
تروح تشوف شغلك
تدفع اجور الناس
وتحسن الانتاج
تعمل خطط للنهوض بمشاكل السكان
يلاقوا أكل وشرب وسرير ف مستشفى
يمشوا ف شوارع نضيفه بفضل ضرايبهم
وبفضل مواردهم
تعبان تشيل سيبها
فيه الف يحسبها
لا هيسحبوا م الناس رسوم على اللقمه
ولا يفرضوا اتاوات
ولا يبنوا للاغنيا اسوار ومرتفعات
ولا يرهبوا اللي اعترض بسجون ومعتقلات
ولا يعملوا قوانين متفصله مظبوط
ع الباشا وعياله
الشعب ده مستحيل تبقى أمه دعياله
طول عمرنا حظنا في الرؤسا مش معدول
بيزقنا مع دول
حرامية الأوطان والمرتشين باسمه
الكام وخمسين فرد
مستثمري الانفتاح
وآكلي التفاح
ونسايب الوزرا
الباشا ابن فلان وحرمه بنت فلان
ازواج ولاد شُركا ف البيع وف التهليب
يعني الوزير مثلا بيبيع مكان لفلان
وفلان ده ابنه شريك ف معرض ابن فلان
وهكذا بتدور
وكلهم كام فرد
واكلين مساحة الأرض
لا بيخضعوا لدستور
ولا رأي عام ولا حق
لا بيدفعوا ف مرور
ولا سمعوا كلمة لأ
الشعب نازل زق ف مواكب الباشوات
وكل يوم فيه حاجات مستحدثة للنصب
رسوم ضريبه مضافه عشان اراضي قضاه
أسعار تزيد الضعف
دولار وصل أقصاه
بتتضرب بال لأ وتتحرم م الآه
ويجبروك لجل عيشك تهتف (اخترناه )

انا المواطن فلان
موجود ف كل مكان
ف الجامعه والشارع
ف ملاعب الكورة
سواق على اتوبيس
مندوب خطوط محمول
عامل نضافه ف سيرك
بياع سميط ف القطر
مدير محل هدوم
طبيب حديث التخرج
فني عربيات
انا كل دول وانت
علشان تلات عائلات
بتبيعني مجاناً
نفس الكلام القديم
نفس السياسه اللي عامله زي دور محفوظ
افلام رخيصه واغاني نفس ما هي
بيشيلوا اسم فلان ويحطوا اسم فلان
نكتب على الدكان عاش الرئيس علشان
مايجيش رئيس الحي يهد راسمالنا
الدولة رسمالنا طريق عشان نمشيه
لا ننط مرة فوقيه ولا ننحني تحتيه
وكإنه شعب قطيع
يتقبّل التطبيع
ويراضي بالرشوه
محروم من الاحلام والحب والنشوه
محروم من التأخير
محروم يروح ماتشات
محروم يقول رأيه
محروم يقول محروم
علشان كبير البوم عاوز سماه صافيه
الامن بالعافيه
والصمت بالعافيه
أول بلد في التاريخ متنعمه وحافيه
أول بلد ف الدنيا فنادقها ورا عشه
الديكتاتور زعلان الدولة تتألم
الديكتاتور زهقان الدولة تتكلم
الديكتاتور بيبيع الدولة تتسلم
وان قولت دي ارضنا
تطلعلك القوانين من غير ماتطلبها
فيه ربعمية مانيكان بيقولوا خُدامك
ويوافقوا احكامك ويقدموا الطاعه
انا المواطن فلان
وانت الرئيس فاسمع
انا دفع مش هادفع
وخضوع ما باعرفشي
لا انت تزيد عني ولا هابقى م القراطيس
انا همشي وهغني للحبس والمحابيس

قال الرئيس: (ادفعوا )
يبقى ما قالش الرئيس.

وجاء هذه الرسالة اعتراضا على ما يحدث في مصر من غلو الأسعار وطلب الرئيس عبد الفتاح السيسي من الشعب المصري أن يعطوه
” الفكة ” وذلك لاستخدامها في مشاريع مصر.


قد يعجبك أيضاً

اترك رد

لن يتم نشر عنوان بريدك الإلكتروني.