فايزة عبد الجواد الملقبة بصاحبة أشهر ضربة رأس بالسينما أجرت آخر لقاء في حياتها عام 2014 مع برنامج “صاحبة السعادة ” حكت فيه عن قصة حياتها ومشوارها الفني.
بالصور.. آخر لقاء أجرته فايزة عبد الجواد صاحبة أشهر ضربة رأس بالسينما قبل وفاتها
وقالت فايزة عبد الجواد: ” أنا من نزلة السمان.. وابتديت العمل في فيلم تمر حنة.. وبعدين رحت عماد الدين للمكاتب السينمائية وطلعت عند تركي الهواري، وعلى وجدي، وعند شميش، وولي السيد، واشتغلت مع المجاميع وولادي كانوا صغار جدًا”.
وأضافت فايزة عبد الجواد: “وابتديت اشتغل في المجاميع وحاجات زي كده وفي يوم كان الأستاذ عادي بيعمل فيلم حب في الزنزانة وطلعت سجانة وشلت المدام سعاد حسني الله يرحمها.. ولسبت سجانة والكلام كله كان لنعيمة الصغير الله يرحمها وأنا كان دوري سجانة صامتة فقط”.
وتابعت فايزة عبد الجواد: “عرفوني إني البنت اللي بتضرب وبتاعة سجون وسجانة ومسجونة.. والشخصية أصبحت متميزة واشتغلت مع الاستاذ نور الشريف في آخر الرجال المحترمين.. واشتغلت دور زبّالة وجاء قال لي يا فايزة انتي متميزة وأنا مش عايزك تشتغلي مجاميع فقلت له الأدوار مش هاتيجي على طول وولادي ياكلوا من اين.. واشتغلت مع الأدوار في مسلسل ونيس ضربت سعاد نصر الله يرحمها وأي فيلم كنت أقوم بهذا الدور وطلعت في الأفلام القديمة كلها بتاعة سعاد حسني مثل خلي بالك من زوزو لما كنا في الفرح”.
اقرأ أيضًا : رفضت الزواج وارتدت الحجاب ثم خلعته.. أسرار في حياة الراحلة ميرنا المهندس
ضرب الدماغ صنعة
وقالت: ” بعدها أخدت أدوار مع مدام ليلى علوي في فيلم الهجامة من اخراج الاستاذ محمد النجار.. وشاركت في أفلام كتيرة أوي.. وضربتك (تقصد اسعاد يونس) بتوصية من الفنانة هياتم” مضيفة: “وكنت مشهورة إن لو حد حقه ضايع أطلع أضربه وناخد حقنا وكنت بضرب عشر رجالة وليا صنعة في ضربة الراجل، وأضربه بالدماغ ومكانتش بتوجعني.. لأن ضربة الدماغ صنعة ما اضربش عشان اتعور لاء عشان أعور”.
وتابعت: ” أنا من النوع اللي ميحبش الخناق وبحب الناس تحبني ومحبش أتطفل على الناس ومهما يكون في بيتي إيه ولا أحب ألجأ إلا إلى الله.. أنا ربيت 6 عيال وبدراعي واشتغلت شغلانات كتيرة.. والنار اتعلمتها وكنت أسرح في الصباح ألعبها في الشارع وعلى المقاهي والعدّة كانت السيخ والجركن اللي فيه جاز وصلاح ابني كان صغير وكنت أروح ألبس البنطلون وأروح اشتغل، والفلوس كانت بتترمي عليا كتير من السعوديين”.
وقالت: “لما السينما ريحيت لجأت للاستاذ عمرو عرفة قلت له أنا عايزة اشتغل قالي تشتغلي ايه يا فايزة؟ قلت له أي حاجة ملابس أو أي حاجة.. فاشتغلت في الاعلانات في قسم الملابس وأغسل الملابس وأكويها وحاجات زي كده.. بعدها ذهبت لشركة أوسكار للأفلام وعملت مسرحية بتاعة الأستاذ سمير غانم (أنا والنظام وهواك) ومع محمد هنيدي وعلاء ولي الدين مسرحية مسكت ادارة الملابس”.
وتابعت: “في مسلسل كيد النسا ضربت سمية الخشاب ووقعتها على عربية حمص الشام، وهي كانت خايفة مني أول ما اشتغلنا مع بعض، وعملنا شغل حلو أوي في الحارة، ومحدش عورني على الاطلاق أنا اللي كنت أعوّر، وأنا بصلي وبعبد ربنا وعايزة أقول مفيش راجل شفي زي ما شقيت على أولادي”.
